3.09c
Երեվան
չրք, նմբ 13
Մեծ պահքի առաջին օրն է:
Հայ Առաքելական Սուրբ Եկեղեցին մուտք կը գործէ իր ծիսական կեանքի ամենէն իւրայատուկ եւ խորհրդաւոր շրջաններէն մէկը՝ Մեծ պահքի շրջանը: Այս տարի Մեծ պահքը կը սկսի 12 փետրուարին եւ կ՚աւարտի 22 մարտին: Աստուծոյ ողորմութեամբ ու բարերար կամքով, այս տարի եւս մեր սիրելի ընթերցողներուն հետ ամէնօրեայ կարճ գրութիւններով պիտի փորձենք միասնաբար կատարել այս հոգեւոր ճամբորդութիւնը, փորձելով արժանանալ Տէր Յիսուսին հանդիպելու՝ Իր Հրաշափառ Յարութեան:
Այս տարուան մեր խորհրդածութիւնները կը սկսինք Հայ Առաքելական Սուրբ Եկեղեցւոյ Ամերիկայի Արեւելեան թեմի բարեջան առաջնորդ՝ Գերշ. Տ. Մեսրոպ Եպիսկոպոս Պարսամեանի Մեծ պահքի հոգեւոր բճամբորդութեան մասին ըսած հայրական խօսքով:
Սիրելի քոյրեր եւ եղբայրներ, կրկին Մեծ պահքի շրջանին մէջ ենք: Մեծ պահքի ընթացքին կը յորդորեմ եւ կը քաջալերեմ որպէսզի բոլորս միասնաբար, գործադրութեան մէջ դնենք գործնական այն երեք առաքինութիւնները, որոնք կը կազմեն Մեծ պահքին հիմքը.
Աղօթք:
Ծոմապահութիւն-պահեցողութիւն:
Ողորմութիւն:
ա. Աղօթքի միջոցով մենք մեր Երկնաւոր Հօր հետ մեր յարաբերութիւնը կը հաստատենք ու կը զարգացնենք:
բ. Ծոմապահութեամբ, պահեցողութեամբ, մենք ինքնահայեցողութիւն կը կատարենք, կը զսպենք մեր ցանկութիւնները եւ մենք մեզ կը տրամադրենք, որպէսզի այդ յարաբերութեան մէջ կարողանանք խորանալ ու հասկնալ այդ յարաբերութեան էութիւնը:
գ. Ի վերջոյ, ողորմութեան միջոցով մենք մեր սէրը կ՚արտայայտենք մեր դիմացինին հանդէպ:
Հետեւաբար, այս երեք գործնական առաքինութիւններուն միջոցով՝ Աստուծոյ, մեր անձին եւ մեր դիմացինին հանդէպ սիրոյ այդ դրսեւորումը Մեծ պահքի ընթացքին մեր կեանքին մէջ թող զօրանայ: Աւելին, այս գործնական առաքինութիւններով Մեծ պահքի ընթացքին պատրաստուինք մեր Տիրոջ Յիսուս Քրիստոսի Հրաշափառ Յարութիւնը միասնաբար դիմաւորելու եւ տօնախմբելու:
Թող Աստուած զօրացնէ բոլորիս այս հոգեւոր ճամբորդութեան մէջ: Աստուծոյ օրհնութիւնները բոլորիս հետ ըլլան այսօր եւ յաւիտենաս: Ամէն:
Վարանդ Քորթմոսեան
«Ժամանակ»/Պոլիս
