29.09c
Երեվան
երք, սպտ 22
Իսրայէլի պաշտպանութեան բանակը այս տարուան սկիզբէն երեք նոր ամրացուած ռազմակայան ստեղծած է Լիբանանի հարաւը՝ երկու պետութիւններու միջեւ սահմանազատման գիծէն («կապոյտ գիծէն») դէպի հիւսիս։ Այդ մասին յայտնած է The National թերթը՝ վկայակոչելով Լիբանանի մէջ ՄԱԿ-ի Ժամանակաւոր ուժերու (UNIFIL) մամուլի քարտուղար Քենտի Արտելը։
«Մինչեւ այս տարուան Մարտին տեղի ունեցած սրացումը, իսրայէլեան բանակը կը գործէր հինգ ամրացուած ռազմակայաններու մէջ՝ «կապոյտ գիծ»ի մերձակայքը եւ անկէ հիւսիս։ Այս տարի մենք յայտնաբերած ենք երեք նոր ամրացուած ռազմակայան «կապոյտ գիծ»էն դէպի հիւսիս», նշած է Արտելը։
UNIFIL-ի տուեալներով՝ Լիբանանի հարաւին մէջ Իսրայէլի պաշտպանութեան բանակը, ընդհանուր առմամբ, ունի շուրջ 30 ամրացուած դիրք։ Երեք նոր ռազմակայանները ստեղծուած են ի պատասխան լիբանանեան «Հըզպալլա» շարժման յարձակումներուն, որոնք սկսած են՝ ի պատասխան Իրանի դէմ Միացեալ Նահանգներու եւ Իսրայէլի կողմէ ռազմական գործողութիւններու մեկնարկին։
Ինչպէս կը նշէ թերթը, նոր ամրացուած դիրքերու ստեղծումը կը վկայէ Լիբանանի հարաւին մէջ Իսրայէլի ռազմական ներկայութեան ուժեղացման մասին՝ երկու պետութիւններուն միջեւ խաղաղ կարգաւորման շուրջ ընթացող բանակցութիւններու լոյսի ներքոյ։
