21.07c
Երեվան
կրկ, հլս 19
Սուրիոյ Հոմս քաղաքէն հասած տեղեկութիւններուն համաձայն, ապահովական ուժերը յաջողած են ազատ արձակել քրիստոնեայ կին մը, որ շուրջ տասը օր առաջ առեւանգուած էր Հին Հոմսի շրջանին մէջ։ Դէպքը խոր մտահոգութիւն յառաջացուցած էր տեղւոյն բնակչութեան մօտ, յատկապէս քրիստոնեայ համայնքին մէջ, որ վերջին տարիներու պատերազմական եւ ապահովական բարդ պայմաններուն մէջ արդէն իսկ ծանր փորձութիւններու ենթարկուած է։
Առեւանգողները կնոջ ազատ արձակման դիմաց պահանջած էին 40 հազար ամերիկեան տոլար փրկագին։
Ապահովական ուժերու գործողութեան իբրեւ արդիւնք՝ կինը ազատ արձակուած է, իսկ առեւանգման մէջ ներգրաւուած անձերը ձերբակալուած են։
Տեղեկութիւնները կը նշեն, որ գործողութիւնը կատարուած է այն պահուն, երբ առեւանգիչները կը շարունակէին ճնշում բանեցնել ընտանիքին վրայ՝ պահանջուած գումարը ստանալու նպատակով։
Այս դէպքը անգամ մը եւս կը բացայայտէ Սուրիոյ շարք մը շրջաններուն մէջ տակաւին առկայ ապահովական խոցելի վիճակը, ուր պատերազմէն ետք ալ յանցաւոր խմբակներ կը փորձեն շահագործել ժողովուրդի վախն ու անորոշութիւնը։
Միաժամանակ, կնոջ ազատ արձակումը կը ներկայացուի իբրեւ կարեւոր քայլ մը՝ յանցագործ ցանցերու դէմ պայքարին եւ քաղաքացիական անվտանգութեան վերահաստատման ճիգերուն մէջ։
ոմսի քրիստոնեայ համայնքը, որ պատմական ներկայութիւն ունի քաղաքին մէջ, վերջին տասնամեակին մեծապէս տուժած է պատերազմի հետեւանքներէն՝ տեղահանութիւն, տնտեսական ծանր պայմաններ եւ ապահովական սպառնալիքներ դիմագրաւելով։ Այդ պատճառով ալ նման դէպքեր համայնքային յիշողութեան մէջ կը թողուն ծանր հետք, նոյնիսկ երբ անոնք կ՚աւարտին ազատ արձակումով։ Կը սպասուի, որ ձերբակալուածները ենթարկուին հարցաքննութեան՝ պարզելու համար առեւանգման ամբողջական հանգամանքները, հնարաւոր կապերը եւ այն ցանցը, որ կրնայ կանգնած ըլլալ նման գործողութիւններու ետին։
