20.09c
Երեվան
երք, մյս 19
17 եւ 18 տարեկան երկու երիտասարդ կրակ բացած են Քալիֆորնիոյ նահանգի Սան Տիէկօ քաղաքի մզկիթներէն մէկուն մէջ՝ սպաննելով երեք անձ։ Անոնք, այնուհետեւ, հրաձգութեան վայրէն քանի մը թաղամաս անդին, անձնասպան եղած են։ Այս մասին կը հաղորդէ The Associated Press լրատուական գործակալութիւնը։
Ոստիկանութիւնը դէպքը կը հետաքննէ որպէս ատելութեան հողի վրայ գործադրուած յանցագործութիւն։ Յայտնաբերուած է երկտող մը, որ կը պարունակէր «ընդհանուր ատելութեան հռետորաբանութիւն եւ ատելութեան խօսք»։
Յարձակումէն առաջ ոստիկանութիւնը արդէն կը փնտռէր դեռահասներէն մէկը, քանի որ անոր մայրը դիմած էր ոստիկանութիւն եւ ըսած, որ իր որդին անձնասպանութիւն գործելու մտադրութիւն ունէր եւ տունէն փախած է։ Բացի այդ, որոշ զէնքեր կը պակսէին, իսկ կնոջ ինքնաշարժը եւս չկար։
Ոստիկանութիւնը նաեւ տեղեկացած էր, որ երիտասարդը հագած է քօղարկիչ զինուորական համազգեստ եւ կը գտնուի իր ծանօթներէն մէկուն հետ, որ այնքան ալ բնորոշ չէ անձնասպանութեան մտադրութիւն ունեցող մարդու մը։
Ոստիկանութիւնը սկսած է երիտասարդներու որոնումները. անոնցմէ մէկու նախկին դպրոցը նախազգուշացուած են հնարաւոր վտանգի մասին։
Մինչ ոստիկանները կը հարցաքննէին դեռահասներէն մէկուն մայրը, մզկիթին մէջ կրակոցներ հնչած են։ Զոհերէն մէկը անվտանգութեան աշխատակից է, որ, ըստ ոստիկանութեան, մեծ դեր ունեցած է յարձակումը աւելի լայն ծաւալի չհասնելուն մէջ։
Դէպքը տեղի ունեցած է Սան Տիէկոյի ամէնէն մեծ մզկիթին մէջ, որուն կից նաեւ դպրոց կը գործէ։
Ոստիկանները հասած են կանչէն չորս վայրկեան ետք։ Այդ պահուն քանի մը թաղամաս անդին նոր կրակոցներ հնչած են։ Հրաձիգները կրակած են այգիներու ձեւաւորմամբ զբաղող անձի վրայ, որ չէ վնասուած։ Այնուհետեւ, մօտակայ ճանապարհի մէջտեղը կայանած ինքնաշարժի մէջ գտած են երկու երիտասարդներու մարմինները։
