34.91c
Երեվան
երկ, հլս 27
Այս պահուն կը գտնուինք Իրանի Իսլամական Հանրապետութեան դեսպանատան առջեւ եւ «Բարգաւաճ Հայաստան» կուսակցութեան ներկայացուցիչներու այցն այստեղ կը կրէ ե՛ւ գործնական, ե՛ւ խորհրդանշական բնոյթ: Այս մասին ըսած է ԲՀԿ մամուլի խօսնակ Իւեթա Տօնոյեանը։
«Ուրբաթ, ԲՀԿ քաղաքական խորհրդի եւ կուսակցութեան անունից նամակներ են ուղարկուել Հայաստանում գործող բոլոր դիւանագիտական ներկայացուցիչներին, մեր երկրում իրենց առաքելութիւնն իրականացնող դեսպաններին, ինչպէս նաեւ միջազգային կառոյցներին, մասնաւորապէս՝ մեր երկրում իրենց դիւանագիտական առաքելութիւնն իրականացնող բոլոր անձանց ուշադրութիւնը հրաւիրել ենք ԲՀԿ նախագահ Գագիկ Ծառուկեանի նկատմամբ սանձազերծուած քաղաքական հաշուեյարդարի գործընթացի վրայ։
Դիւանագետների ուշադրութիւնը հրաւիրել ենք այն փաստի վրայ, որ տեղի է ունենում մարդու իրաւունքների, ժողովրդավարութեան նորմերի կոպտագոյն խախտում եւ միջազգային կառոյցները, մեր երկրում իրենց առաքելութիւնն իրականացնող դիւանագէտները պէտք է իրենց ամէնօրեայ ուշադրութեան կեդրոնում պահեն այս հարցը, յատկապէս, որ բոլոր այս կառոյցների կողմից ժողովրդավարութիւն, ժողովրդավարական նորմեր կոչուող եզրոյթները մշտական են օգտագործման համար։
Մենք ուզում ենք հաւատալ, որ դրանք լոկ բառեր չեն, որ Հայաստանում գործող դիւանագէտներն իրենց արդար գնահատական են տալու Գագիկ Ծառուկեանի նկատմամբ սանձազերծուած այս գործընթացների հետ կապուած։
Ինչո՞ւ ենք մենք այսօր Իրանի Իսլամական Հանրապետութեան դեսպանատան առաջ, որովհետեւ ցանկութիւն կայ նորին գերազանցութիւն պարոն դեսպանին, պարոն Շիրղոլամիին անձամբ փոխանցել «Բարգաւաճ Հայաստան» կուսակցութեան նամակը, որտեղ նկարագրուած է ամբողջ այն իրաւական «беспредел»-ը («կամայականութիւն»), որը սանձազերծուել է Գագիկ Ծառուկեանի նկատմամբ։
Մեր համար անընդունելի է, որ Իրանի Իսլամական Հանրապետութեան երկու քաղաքացու, վստահաբար կարող եմ ասել՝ երկու խարդախի, երկու խաբեբայի պատճառով վտանգուած են հայ-իրանական դարաւոր բարեկամական յարաբերութիւնները»,-նշած է Իւեթա Տօնոյեանը։
