20.09c
Երեվան
ուրբ, հկտ 09
Կղզեաց Տ. Յարութիւն Վրդ. Տամատեան, օրերս, Գնալը կղզիի Ս. Գրիգոր Լուսաւորիչ եկեղեցւոյ մէջ հանդիսապետած է Կիրակիի արարողութիւններուն եւ մատուցած Ս. Պատարագը։ Այս առիթով ան իր քարոզին մէջ անդրադարձած է Աստուծոյ կողմէ հաստատուած միութեան խորհուրդին՝ փառք տալով ամրան ընթացքին եկեղեցւոյ մէջ տեղի ունեցած հոգեւոր գործունէութեանց համար։
Այս մասին «Արեւելք» իմացաւ Պոլսոյ մեր պաշտօնակից՝ «Նոր Մարմարա»էն, որ մասնաւորապէս կը գրէ՝
Գնալը կղզիի Ս. Գրիգոր Լուսաւորիչ եկեղեցւոյ մէջ, 20 Սեպտեմբեր 2026, Կիրակի առաւօտ արարողութեանց հանդիսապետեց եւ Ս. Պատարագը մատոյց Կղզեաց Տ. Յարութիւն Վրդ. Տամատեան։ Երգեցողութիւնները կատարուեցան Ներսէսեան Դպրաց Դասու կողմէ, առաջնորդութեամբ Արթուն Սրկ. Թէքիրօղլուի եւ երգեհոնահարութեամբ Սիրուն Սիրունեանի։ Նախ քան Տէրունական Աղօթքը, Հայր Սուրբը քարոզեց եւ յայտնեց որ այս ամրան վերջին Ս. Պատարագը կը մատուցուի Ս. Գրիգոր Լուսաւորիչ եկեղեցւոյ մէջ։ Այս առթիւ անցեալ օրհնեալ շրջանի մը համար փառք տուաւ Աստուծոյ եւ մաղթեց, որ ամրան օրհնութիւնը տարածուի նաեւ բոլոր հաւատացեալներուն։ «Ով որ Աստուած միացուց, թող մարդ չբաժնէ» տողերուն վրայ շեշտը դնելով, յայտնեց որ Աստուած մարդը ստեղծած է որպէս միս եւ որպէս հոգի։ Այս երկուքը իրարու կապուած են մեր ծննդեան առաջին իսկ մէկ օրէն։ Այս միութիւնը շարունակական կը մնայ մինչեւ այն օր երբ մարդ մը իր վերջին շունչը կ'աւանդէ։ Մեր ստեղծագործութեան պատմութեան մէջ հետեւաբար հոգիին ներկայութիւնը, ազդեցութիւնը եւ փրկութիւնը Աստուածային ծրագրի մաս կը կազմէ։
Արարողութեան աւարտին ներկաներ եկեղեցւոյ պարտէզին մէջ անմիջական զրոյց ունեցան։ Անոնք Հայր Սուրբին մօտենալով շնորհակալութիւն յայտնեցին ամրան ընթացքին եկեղեցւոյ հովանիին ներքեւ կազմակերպուած հոգեւոր եւ մշակութային բոլոր գործունէութեանց համար։
