21.09c
Երեվան
երք, հնս 10
Սուրիոյ Հանրապետութեան նախագահ Պաշշար Ասատ Դամասկոսի նախագահական պալատին մէջ հիւրընկալած է Իրանի Արտաքին գործոց նախարարի առաջին օգնական Հիւսէյն Ժապըրի Անսարին ու վերջինիս ուղեկցող պատուիրակութիւնը:
«Սանա» լրատուական գործակալութեան փոխանցմամբ, հանդիպման ժամանակ շեշտը դրուած է Սոչիի համագումարի օրակարգի կարեւորագոյն կէտերուն ու անոնց լուծումներու ուղղութեամբ տարուելիք համատեղ աշխատանքին վրայ, միաժամանակ շեշտելով, որ միջազգային միջնորդ Տէ Միսթուրայի դերը պիտի սահմանափակուի երկխօսութեան ճկունութիւնն ապահովելով:
Հանդիպման ընթացքին անդրադարձ կատարուած է նաեւ Թուրքիոյ կողմէ Սուրիոյ Աֆրին քաղաքին դէմ իրականացուած պատերազմական գործողութիւններուն:
Ասատ բարձր գնահատելով բարեկամ երկիրներու միջեւ մշտական համագործակցութիւնն ու համատեղ որոշումներու կայացումը շեշտած է, որ Սուրիոյ ժողովուրդն է իր երկրի ապագային վերաբերող բոլոր որոշումներու կայացման գլխաւոր դերակատարը: Ան նաեւ ըսած է, որ «Թուրքիոյ պատերազմական գործողութիւնները անգամ մը եւս կ'ապացուցեն, որ Թուրքիա կը շարունակէ թշնամաբար տրամադրուած մնալ Սուրիոյ դէմ», -ընդգծելով, որ «Աֆրինի մէջ թրքական ուժերու ներկայութիւնը եւս մէկ ապացոյց է, որ կարելի չէ վստահիլ անոր վարած քաղաքականութեան եւ այդ քաղաքականութեան հովանաւորներուն»:
