20.09c
Երեվան
շբթ, մյս 09
«Յորդանանահայ համայնքը անգամ մը եւս ապացուցեց աշխարհին, որ հայը կը շարունակէ ապրիլ ու արարել»,-Յորդանանի մէջ «Խոստումը» ժապաւէնի ցուցադրութեան առթիւ «Արեւելք»ին հետ զրուցելով՝ ըսաւ յորդանանահայ, «Վարդավառ» երգչախումբի կազմակերպչական հարցերու պատասխանատու Մարալ Ներսէսեանը:
Նշենք, որ Յորդանանի մէջ ֆիլմի ցուցադրութիւնը կազմակերպուած էր Մարալ Ներսէսեանի ջանքերով, «Վարդավառ» երգչախումբի համագործակցութեամբ:
«Յորդանանի մայրաքաղաք Ամմանի մէջ 25 ապրիլին տեղի ուեցաւ «Խոստումը» ֆիլմի առաջին (փրեմիերա) ցուցադրութիւնը: Ամմանի բոլոր շարժանկարի սրահներէն ներս ժապաւէնը պիտի ցուցադրուի հանրութեան 27 ապրիլին, 2 շաբաթ շարունակ»,-տեղեկացուց Մարալ, նշելով, որ շարժապատկերի սրահի պատասխանատուները, դիմելով իրեն, խնդրած են յորդանանահայութեան համար առանձին ցուցադրում մը կազմակերպել, որուն մեր զրուցակիցը ընդառաջած է:
«Արեւելք»ի այն հարցին, թէ արդեօք թրքական պետութեան կողմէ ժապաւէնի ցուցադրման դէմ բանեցուած ճնշումներու ալիքը իր ազդեցութիւնը պիտի ունենայ նաեւ Յորդանանի մէջ, Ներսէսեան պատասխանեց, որ ինք նոյն մտահոգութեամբ այս հարցը ուղղած է «Թաճ» շարժանկարի սրահի տնօրինութեան, որուն կը պատկանի Յորդանանի մէջ ֆիլմը ցրուելու իրաւունքը: «Սրահի տնօրինութիւնը հաւաստիացուց, որ այնքան ժամանակ, որ Յորդանանի պետական գրաքննութիւնը արտօնութիւն տուած է ֆիլմի ցուցադրութեան, ոչ մէկ հարց կրնայ ստեղծուիլ: Պետական գրաքննութիւնը համաձայնած է ցուցադրութեան եւ բոլոր սրահները իրաւունք ունին այն ցուցադրելու»:
Խօսելով առաջին ցուցադրութեան մասին, օրդ. Ներսէսեան յայտնեց, որ Ամմանի նշանաւոր «Թաճ» շարժանկարի սրահէն ներս (Taj Cinemas) մեծ շուքով կայացած է «Խոստումը» ֆիլմի փրեմիերան: «Տրամադրուած երկու դահլիճները լեփ-լեցուն էին. ներկայ էր 330 անձ»,- ըսաւ Մարալ, նշելով, որ Ֆիլմի անդրանիկ ցուցադրման ներկայ գտնուած է նաեւ Հայաստանի Պատուոյ Հիւպատոս Պր. Արթուր Սքլճեանը։
« «Խոստումը» ֆիլմի յորդանանեան անդրանիկ ցուցադրումը մեծ յաջողութեամբ պսակուեցաւ»,-ըսաւ «Արեւելք»ի զրուցակիցը եւ առիթը բաց չթողելով իր երախտագիտութիւնը յայտնեց Հաշիմական ընտանիքին, որ ջարդերէն մազապուրծ եղած հայերուն ջերմօրէն ընդունեց եւ Շէրիֆ Հիւսէյն Պըն Ալիի 1917-ի հրամանագրի համաձայն հաւասար իրաւունքներ շնորհեց հայերուն։
« «Խոստումը» ֆիլմը ցեղասպանութիւնը այլ ազգերուն ծանօթացնելու համար նոր տարբերակ կրնայ հանդիսանալ»,- ըսաւ Ներսէսեան, եզրափակելով զրոյցը:
