26.09c
Երեվան
կրկ, սպտ 13
Sputnik Armenia առցանց թերթը կը հաղորդէ, որ Հայաստանի օդանաւային շուկային մէջ ապրիլին պիտի յայտնուի նոր ազգային փոխադրող` Armenia օդանաւային ընկերութիւնը, որ ճամբորդներուն մատչելի գիներով տոմսեր պիտի առաջարկէ: Armenia օդանաւային ընկերութիւնը 49 տոլարի թռիչքներ պիտի ապահովէ Երեւանէն Եւրոպա, ԱՊՀ-ի երկիրներ, մասամբ` Ասիոյ երկիրներ: Այդ մասին յայտնած է ընկերութեան բաժնետէրերէն` Թամազ Կայաշվիլի: Նման գինով պիտի կարենան թռչիլ անոնք, որոնք նախապէս՝ մէկ կամ երկու ամիս առաջ, տոմսեր պիտի պատուիրեն, նշած է ան եւ աւելցուցած, որ հայկական ազգային օդանաւային ընկերութեան առաջին թռիչքը տեղի պիտի ունենայ ապրիլի երկրորդ կիսուն: Կայաշվիլի հերքած է այն լուրերը, ըստ որոնց՝ նոր ընկերութեան բաժնետէրերէն մէկը պիտի դառնայ Հայաստանի վարչապետ Յովիկ Աբրահամեան։ Ան աւելցուցած է, որ ոչ ոք, յատկապէս Հայաստանի ղեկավարութիւնը, կապուած է ընկերութեան հետ: Ընկերութեան գլխաւոր տնօրէն Ռոպերտ Յովհաննիսեան տեղեկացուցած է, որ առաջին թռիչքը պիտի կատարուի Boeing 737-700 օդանաւով: Ընկերութեան անձնակազմը կազմուած պիտի ըլլայ 350 հոգիէ, որոնց շարքին պիտի ըլլան վրացական Airzena օդանաւային ընկերութեան քանի մը աշխատող, իսկ մնացեալին ընտրութիւնը պիտի կատարուի տեղւոյն մասնագէտներէն: Ռոպերտ Յովհաննիսեան եղած է վրացական Georgian Airways ընկերութեան տնօրէնի պաշտօնակատար, իսկ Թամազ Կայաշվիլի Georgian Airways-ի տնօրէններու խորհուրդի նախագահն է: 2013ին, Հայաստանի կառավարութիւնը հաստատեց օդային փոխադրումներու ոլորտի փուլային ազատականացման ռազմավարութիւնը, երբ Հայաստանի ազգային օդանաւային «Արմաւիա» ընկերութիւնը որոշում կայացուց 2013 ապրիլ մէկէն թռիչքներու դադրեցման եւ սնանկացման գործընթաց սկսելու մասին: ՀՀ կառավարութիւնը քաղաքացիական օդագնացութեան ոլորտին մէջ որդեգրած է «բաց երկինք»ի քաղաքականութիւնը, որ կ՚ենթադրէ պետութեան միջամտութեան նուազեցում՝ օդանաւային ընկերութիւններու առեւտրային գործունէութեան:
