16.09c
Երեվան
չրք, հկտ 28
Հայաստանի ազգային գրադարանը տեղեկացնում է, որ գրադարանի ինքնագրերի հավաքածուներում պահպանվում է Արամ Խաչատրյանի ինքնագրով բացառիկ համերգային ծրագիր։ Հատկանշական է, որ մեծ կոմպոզիտորը իր ստորագրությանը կից ծրագրի էջում թողել է նաև յուրահատուկ՝ նոտային էքսլիբրիս հիշեցնող պատկեր։
Բուկլետը տպագրվել է Բեյրութում 1961 թվականին։ Ծրագրից պարզ է դառնում, որ այդ տարի Արամ Խաչատրյանը համերգներով հանդես է եկել Լիբանանում։ Մասնավորապես, ծրագրում նշվում է, որ սիմֆոնիկ համերգը ղեկավարել է ինքը՝ Արամ Խաչատրյանը, իսկ մենակատարների թվում հիշատակվում է նաև իտալացի դաշնակահար Սերջո Պետրիկարոլին, որի ինքնագիրն էլ պահպանվել է ծրագրի՝ իրեն նվիրված էջում։
Ծրագրում նշված է նաև, որ Բեյրութի համերգը կայացել է մայիսի 14-ին, իսկ Արամ Խաչատրյանն ու Սերջո Պետրիկարոլին հանդես են եկել Կահիրեի սիմֆոնիկ նվագախմբի հետ։ Ըստ հրապարակված տվյալների՝ 1961 թվականի մայիսին Բեյրութում տեղի են ունեցել կոմպոզիտորի հեղինակային երեք համերգներ՝ մայիսի 12-ին, 13-ին և 14-ին, իսկ մայիսի 17-ին՝ հրաժեշտի համերգը։
Այս համերգային շրջագայությունը պատահական դրվագ չէր․ 1961 թվականին կոմպոզիտորը արժանացել է նաև Միացյալ Արաբական Հանրապետության «Գիտություն և արվեստ» մեդալին, ինչը ևս ընդգծում է նրա արվեստի միջազգային արձագանքը տարածաշրջանում։
Սերջո Պետրիկարոլին հետագայում դարձավ միջազգային ճանաչում ունեցող դաշնակահար և դասախոս․ պաշտոնական աղբյուրները նշում են, որ նա ելույթ է ունեցել աշխարհի կարևոր բեմերում և դասավանդել է Հռոմի Սանտա Չեչիլիայի ակադեմիայում՝ դառնալով նաև դրա պրոֆեսոր-էմերիտուս։ Այս հանգամանքն ավելի է ընդգծում, թե որքան ներկայացուցչական ու արժեքավոր է պահպանված համերգային ծրագիրը։
