18.09c
Երեվան
ուրբ, մյս 08
Հալէպի հայկական շրջանները ապահով են, բայց ամայի: Այս մասին «Արեւելք» տեղեկութիւն ստացաւ Հալէպի իր աղբիւրէն: Մեր աղբիւրը նաեւ փոխանցեց, թէ մասնաւորապէս երէկ գիշեր հայկական թաղամասերու մէջ «հաուն» տիպի հրթիռներ ինկած են, եւ բարեբախտաբար մարդկային զոհեր չեն գրանցուած: Մեր աղբիւրին համաձայն, հայկական թաղերուն մէջ կը տիրէ զգուշաւոր վիճակ մը եւ բնակիչները իրադրութեան պատճառով ապաստանած են իրենց բնակարաններուն մէջ: Նշենք, որ երէկուընէ ի վեր եւ մինչեւ այս պահը Հալէպ զրկուած կը մնայ համացանցային կապի միջոցներէ: Քաղաքին մէջ կը շարունակուին ջուրի եւ ելեքդրականութեան սուր տագնապները: Յիշեցնենք, որ անցնող ժամերուն ապահովական դրութիւնը դարձեալ ծանրացած է Հալէպի յատկապէս արեւմտեան շրջաններուն մէջ: Ընդդիմադիր զինեալներ յայտարարած են, որ Հալէպի մէջ սկիզբ առած ճակատամարտը պիտի շարունակուի, եւ անոնք գրոհներ կատարած են յատկապէս «Տահիյաթ ալ ասատ», «Ֆամիլի Հաուս» , «Ժամհիյաթ Ալ Զահրա» եւ «Մաշրուհ 1070» շրջաններու ճակատներուն ուղղութեամբ: Անոնք զինուորագրած են աւելի քան 3000 զինեալներ եւ մարտերը մինչեւ այս ժամը կը շարունակուին: «Արեւելք» այս մասին գրած է այս առաւօտ՝ յղում ընելով եւ «Ալ մայատին» եւ RT կայաններուն:
