27.97c
Երեվան
չրք, հնս 10
Համացանցի վրայ հրապարակուած են Տէր Զօրի «Սրբոց Նահատակաց» եկեղեցւոյ լուսանկարները: Լուսանկարները հրապարկուած են սուրիացի լրագրող Ահմատ Համտուշի դիմատետրի էջին վրայ եւ կը ներկայացնեն ծանր վնասներու ենթարկուած եկեղեցիի ընդհանուր իրավիճակը:
Յիշեցնենք, որ Սուրիոյ պատերազմին շղթայազերծումէն ասդին հայութեան համար ուխտավայր համարուող «Սրբոց Նահատակաց» եկեղեցին ենթարկուած էր ծանր հարուածներու եւ վերջին վանտալիզմը գործուած էր սեպտեմբեր 2014-ին, երբ «Իսլամական պետութեան» ահաբեկիչներ ականահարուած էին եկեղեցին:
2013-էն սկսեալ ռազմական եւ տնտեսական առումներով կարեւոր դիրք ունեցող Սուրիոյ Տէր Զօրի նահանգը կը գտնուէր «Իսլամական պետութեան» տիրապետութեան տակ: Երկար ամիսներ տեւած մարտերէ ետք Սուրիոյ բանակը յաջողեցաւ իր տիրապետութիւնը տարածել քաղաքին վրայ եւ երկու օր առաջ բանակը կը յայտարարէր Տէր Զօրի ամբողջական ազատագրումը:
Ցեղասպանուած հայութեան համար վերապրելու եւ պայքարի խորհրդանիշ դարձած Տէր Զօրի մէջ հայութիւնը, գլխաւորութեամբ Մեծի Տանն Կիլիկիոյ Կաթողիկոսութեան կառուցած էր այդ գեղակերտ եկեղեցին: Եկեղեցին կը կառուցուէր 1931 թուականին կանգնած եւ նահատակներու աճիւններ պարունակող Սուրբ Հռիփսիմէ եկեղեցւոյ հիմքերուն վրայ, որուն օծումն ու բացումը կատարուած էր 6 դեկտեմբեր 1931-ին ձեռամբ վախճանեալ Տ. Արտաւազդ արք. Սիւրմէլեանին:
«Սրբոց Նահատակաց» Եկեղեցւոյ օծումն ու բացումը կատարուած էին 4 մայիս 1991-ին, ձեռամբ Երջանկայիշատակ Ն.Ս.ՕՏ.Տ. Գարեգին Ա. (այդ օրերուն տակաւին Մեծի Տանն Կիլիկիոյ Գարեգին Բ.ն) Ամենայն Հայոց Կաթողիկոսին:
Եկեղեցւոյ բացման հանդիսաւոր արարողութեան օրերուն Տէր Զօրը դարձած էր ամբողջ հայութեան համար ուխտատեղի եւ մեր ժողովուրդի պայքարը խորհրդանշող հաւատքի եւ յոյսի իրական ամրոց մը:
Այսօր այդ եկեղեցին կը գտնուի աւերակուած վիճակի մը մէջ, բայց հաւատքով ենք, որ հայութեան ամբողջական ճիգերով կարելի պիտի ըլլայ դարձեալ ոտքի հանել տարբեր առումներով ալ հայութեան համար մեծ իմաստներ կրող «Սրբոց Նահատակաց» եկեղեցին:
