20.09c
Երեվան
հնգ, մյս 07
Սուրիոյ բանակի ջոկատներ, անցնող շաբաթներուն թէժ մարտեր մղելէ ետք, յաջողած են իրենց տիրապետութեան տակ առնել Հալէպ քաղաքի հիւսիսը գտնուող Պանի Զէյտ քաղաքը: Բանակը նոյնպէս յաջողած է գրաւել «Լայրամուն» գործարանային շրջանը, որ անցող 4 տարիներուն դարձած էր Հալէպի խաղաղ շրջանները թիրախ դարձնող գլխաւոր շրջան: Ըստ «Ալ Մայատին» կայանին, բանակի այս յաղթանակը կարեւոր քայլ մը կը համարուի եւ կ'ամրապնդէ Հալէպի շուրջ ստեղծուած ապահովական գօտին: Աղբիւրը նաեւ կը նշէ, որ այս շրջաններու գրաւումով Հալէպ քաղաքի տասնեակ թաղամասեր կը դառնան ապահով եւ կը վերագտնեն իրենց երբեմնի անդորրը: Կը նշուի նաեւ, որ մինչ տասնեակ զինեալներ խոյս տուած են շրջանէն, փոքր չէ թիւը այն զինեալներուն, որ անձնատուր կ'ըլլան եւ կը յանձնուին իշխանութիւններուն: Տարբեր աղբիւրներ նոյնպէս կը խօսին բանակին եւ ընդդիմադիր զինեալներուն միջեւ եղած համաձայնութեան մը մասին, որուն հիմքով զինեալները պիտի հեռանան Պուսթան Փաշա շրջանէն: Նշենք, որ նոյն օրակարգին առընթեր Սուրիոյ նախագահ Պաշշար Ասատ հրամանագիր մը ստորագրած է կապուած՝ ընդդիմադիր զինեալներուն, յայտարարելով, որ այն զինեալները, որոնք անձնատուր կ'ըլլան, պետական հրամանագրով հաստատուած ներման պիտի արժանանան: Յիշեցնենք, որ հանդարտ իրավիճակ կը տիրէ նաեւ Հալէպի հայկական շրջաններուն մէջ: «Արեւելք»ի աղբիւրին համաձայն, անցնող ժամերուն Հալէպի տարբեր շրջաններուն մէջ քաղաքացիներ տօնախմբութիւններ կը կատարեն, ի տես երկրի բանակին ահաբեկչութեան դէմ տարած պայքարի այս վերջին երեւելի յաղթանակին:
