image

Յակոբ Բագրատունի Կտրականապէս Դէմ Խօսեցաւ Պուրճ Համուտի Աղբանոցին Վերաբացման Մասին

Յակոբ Բագրատունի   Կտրականապէս Դէմ Խօսեցաւ Պուրճ Համուտի Աղբանոցին  Վերաբացման  Մասին

Լիբանան-    «Ազդակ» օրաթերթը  կը գրէ, թէ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ կտրուկ կերպով մերժած է  Պուրճ Համուտի աղբանոցի վերաբացման հաւանականութեան գաղափարը:Նշենք, որ  մէկէ աւելի Լիբանանեան   աղբիւրներ նաեւ քաղաքական  դէմքեր  անցնող օրերուն ընթացքին  եւ   երկրին մէջ առկայ աղբի տագնապին հետեւանքով խօսած էին Պուրճ Համուտի   փակ աղբանոցի  վերաբացման հնարաւորութեանց մասին:  Բագրատունի, որ  հարցազրոյց տուած է Լիբանանեան «Սաֆիր» օրաթերթին «կարմիր գիծ» նկատած է  Պուրճ Համուտի աղբանոցին վերաբացումը, որ «կարելի չէ արտօնել որեւէ պարագայի տակ»: Ըստ Բագրատունիի, Պուրճ Համուտ իր բաժինը կատարած է աղբանոցներու հարցով եւ «այսօր անիկա այն չէ, ինչ որ էր 5 տարի առաջ: Արդարեւ, բնակչութիւնը կրկնապատկուած է գաղթականութեան հոսքին բերումով ու կը բաւեն անոր ներկերու թէ ձկնորսներու հարցերն ու անոր վրայ բեռցուող տագնապները»: Բագրատունի մերժած է  քննել նոյնիսկ աղբանոցի ժամանակաւորապէս բացումի գաղափարը: «Մենք ապրեցանք փորձառութիւնը այդ «առժամեայ»-ին, որ տեւեց երեսուն տարի: Մեր կրած տառապանքին ոչ ոք կը տոկայ ու կը հանդուրժէ», շեշտեց Բագրատունի` կոչ ուղղելով կառավարութեան «տէր կանգնելու իր պատասխանատուութեան եւ մտածելու արմատական լուծումներու մասին, փոխանակ հողային առուծախով ժամավաճառութիւն ընելու»: