14.09c
Երեվան
հնգ, ապր 03
Վախճանած է Բերիոյ Հայոց Թեմէն ներս երկար տարիներու Քահանայ, բազմավաստակ հոգեւոր հովիւ Տ. Համազասպ Ա. Քհն. Շաքարեան: Վերջին օծման եւ քահանայի յատուկ թաղման կարգը կատարուեցաւ Շաբաթ, 29 Մարտին, Սրբոց Քառասնից Մանկանց Մայր եկեղեցւոյ մէջ։
«Արեւելք» այս տխուր եղելութեան մասին իմացաւ Բերիոյ Հայոց Թեմի Առաջնորդարանի պաշտօնական էջէն:
Շաբաթ, 29 Մարտ 2025-ին, առաւօտեան ժամը 09։30-ին, հանդիսապետութեամբ Բերիոյ Հայոց Թեմի Առաջնորդ Գերշ. Տ. Մակար Սրբ. Արք. Աշգարեանի, կատարուեցաւ ի Տէր հանգեալ հայ եկեղեցւոյ ծառայ, Բերիոյ Հայոց Թեմէն ներս երկար տարիներու Քահանայ Հայր, լուսահոգի Տ. Համազասպ Ա. Քհնյ. Շաքարեանի վերջին օծման եւ թաղման կարգի արարողութիւնը, Սրբոց Քառասնից Մանկանց Մայր եկեղեցւոյ մէջ։ Սուրբ եւ Անմահ Պատարագ մատուցեց Մեծի Տանն Կիլիկիոյ Կաթողիկոսութեան երիտասարդ միաբաններէն եւ դպրեվանքի տեսչութեան անդամ Հոգշ. Տ. Աւետիք Վրդ. Տէր Կարապետեանը, որ Սրբազան Հօր կարգադրութեամբ յառաջիկայ շաբաթներուն Թեմէն ներս իր ծառայութիւնը պիտի բերէ մասնակցելով Ծաղկազարդի եւ Աւագ շաբթուան արարողութիւններուն։
Վերջին օծումի եւ թաղման կարգի արարողութեան ներկայ գտնուեցան քրիստոնեայ եկեղեցիներու համայնքապետեր, հոգեւորականներ, Ազգային Երեսփոխանական Ժողովի, Ազգային Կրօնական Ժողովի եւ Ազգային Վարչութեան անդամներ, հալէպահայ միութիւններու եւ հաստատութիւններու ներկայացուցիչներ եւ ժողովուրդի մեծաթիւ զաւակներ։
Սրբազան Հայրը նկարագրելով Քահանայ Հօր առաքինի վարքը, յայտնեց, թէ Տէր Համազասպ իր ողջ կեանքը ապրեցաւ Սաղմոսերգուին բառերով արդարութեան փափաքով, աստուածային սիրով կլանուած, Աստուծոյ անդաստանէն ներս ծառայելու կրակով բոցավառ եւ շուրջ վաթսուն տարիներու քահանայական իր ծառայական կեանքը որպէս կենդանի զոհ ընծայեց Աստուծոյ, եկեղեցւոյ եւ ազգին։ Ան ժողովուրդի զաւակներուն համար եղաւ բարի հովիւ, առաջնորդող, պայքարող, ապաշխարութեան հրաւիրող, գօտեպնդող, աղօթասաց, երգող եւ իր ողջ կեանքը գեղեցիկ մեղեդիի վերածելով՝ արդարութեան, սրբութեան եւ իրաւունքի համար նուիրագործեց։ Այլ խօսքով, վախճանեալ Քահանայ Հօր դար մը տեւած կեանքը Քրիստոսի օրհնութեամբ եւ գթութեամբ՝ ուրախութիւն եւ ցնծութիւն դարձաւ։
Սրբազան Հայրը իր խորազգաց ցաւակցութիւնները յայտնեց լուսահոգի Քահանայ Հօր ընտանեկան պարագաներուն, մաղթելով, որ անոր բարի յիշատակը վառ մնայ բոլորին յիշողութեան մէջ։
Ապա, Սրբազան Հայրը, թեմի հոգեւորականաց դասը, լուսահոգի Քահանայ Հօր որդին Արժ. Տ. Զարեհ Քհնյ. Շաքարեանը եւ իր երէցկինն ու զաւակները, Արժ. Տ. Նարեկ Ա. Քհնյ. Զերենցեանը, վախճանեալին դուստրը Սեդա Շաքարեանը եւ իրենց զաւակը՝ ներկաներուն ցաւակցութիւնները ընդունեցին եկեղեցւոյ «Նիկոլ Աղբալեան» սրահէն ներս։ Որմէ ետք, վախճանեալ Քահանայ Հօր մարմինը փոխադրուեցաւ Ազգային Գերեզմանատուն, ուր կատարուեցաւ Գերեզմանի կարգը եւ վախճանեալ Քահանայ Հօր մարմինը յանձնուեցաւ հողին։
Յիշատակն արդարոյն օրհնութեամբ եղիցի։
