-1.91c
Երեվան
երկ, դկտ 23
Թուրք փոփ երգիչ, 52-ամյա Մեհմեդ Ասարը հայտարարել է, որ ինքը բրիտանացի նշանավոր երգչուհի Ադելի հայրն է: Ծնունդով բոդրումցի նախկին տաքսիստը, որ այժմ երգիչ է, ասում է, որ Ադելի մորը՝ անգլուհի Փեննի Էդքինսին հանդիպել է, երբ վերջինս Թուրքիա էր գնացել իբրև զբոսաշրջիկ և նա իր մեքենայով նրան տեսարժան վայրեր է տարել: Ըստ Մեհմեդ Ասարի, իրենց միջև սիրավեպ է ծագել, լավ ժամանակ են անցկացրել, սակայն անգլուհին ի վերջո հեռացել է: Նրա խոսքերով, կինը հետագայում կրկին Թուրքիա է գնացել, հորդորելով Մեհմեդին միասին հեռանալ երկրից: Մեհմեդը մնացել է Թուրքիայում, իսկ անգլուհին, որ ամուսնացած էր Մարկ Էվանսի հետ, նորից Անգլիա է գնացել, որտեղ 1988-ին ծնվել է Ադելը, իսկ երկու տարի հետո Էվանսը լքել է ընտանիքին:
Թուրք երգիչն ասում է, որ սիրավեպի և երգչուհու ծննդյան տարեթվերը համընկնում են: Նա թուրքական մամուլի համար հատուկ լուսանկարվել է՝ ցուցադրելով իր մատները, որոնցից երկուսը, ըստ նրա, Ադելի մատներին շատ նման են:
Մեհմեդը նաև հին լուսանկար է տրամադրել մամուլին, որտեղ ինքը Ադելի մոր հետ է:
Նախկին տաքսիստ երգիչը պնդել է, որ հենց իրենից է Ադելը ժառանգել երգելու շնորհքը: Մեհմեդը նաև ասել է, որ ինքը հատուկ սպասելիքներ չունի այս հայտարարությունից, ինքը ապրում է Բոդրումում, շատ երջանիկ է, միայն ուզում է, որ իր դուստրը իմանա ճշմարտությունը:
Ինչպես հայտնի է, 2015-ին մամուլին տված հարցազրույցում երգչուհի Ադելն ասել է, որ իր արմատները Թուրքիայից, Անգլիայից և Իսպանիայից են:
