-3.91c
Երեվան
երկ, դկտ 23
Այսօր ամերիկահայ օպերային երգչուհի Լիլի Չուքասզյանի ծննդյան օրն է: Նա ծնվել է 1921 թվականին՝ Չիկագոյում, կյանքից հեռացել 2012-ին՝ Բրենֆորդում:
Լիլի Չուգասզյանի ընտանիքը գաղթել է Սեբաստիայից: Նա մանկուց երգել է երաժշտական երեկույթներում, դպրոցական համերգներում, տոնական միջոցառումների ժամանակ եւ այլն։ Չուգասզյանը աշակերտել է հայտնի երաժիշտ Ֆիլիպ Մանուելին։
1950-ական թվականներին երգել է հայկական եկեղեցիների երգչախմբերում։ 1959 թվականին հանդես է եկել Լիթլ Ռոք քաղաքի օպերային թատրոնում եւ արժանացել մեծ ճանաչման։ Երգել է նաեւ Արկանզասի, Բալթիմորի օպերային թատրոններում։ 1961 թվականին կոմպոզիտոր Ջան Կարլո Մենոտտին Չուգասզյանին հրավիրել է երգելու Ապոլետոյի (Իտալիա) փառատոնում, որտեղ հասել է մեծ հաջողության։
1962 թվականից Լիլի Չուքասզյանը եղել է Նյու Յորքի «Մետրոպոլիտեն» օպերային թատրոնի մեներգչուհի, 1980- ական թվականների վերջից՝ խորհրդատու, դասավանդել է Յեյլի համալսարանում։ Չուգասզյանը կատարել է շուրջ 30 գլխավոր դերերգեր:
Երգչուհին համերգներով ելույթ է ունեցել աշխարհի լավագույն նվագախմբերի եւ անվանի դիրիժորների հետ։ Բացառիկ ձայնածավալի շնորհիվ տարբեր ոճերի երգերի (Յոհան Սեբաստիան Բախ, Ֆրանց Շուբերտ, Յոհաննես Բրամս եւ ուրիշներ) հետ երկացանկում ունեցել է նաեւ մեծակտավ գործեր, կատարել է նաեւ հայկական երգեր(«Կռունկ», Ալեքսանդր Սպենդիարյանի «Օրորոցային» եւ այլն)։
1960-1970-ական թվականներին հայ երգչուհին համարվում էր կոնտրալտո ձայն ունեցող առաջատար երգչուհիներից մեկը։
1967 թվականի սեպտեմբերին հանդես է եկել նաեւ Երևանի Ա. Սպենդիարյանի անվան օպերայի եւ բալետի ազգային ակադեմիական թատրոնում՝ կատարելով Փառանձեմի դերերգը՝ Տիգրան Չուխաճյանի «Արշակ Բ» օպերայում։
1978 թվականին Վաշինգտոնում՝ Սպիտակ Տանը, Լիլի Չուքասզյանը երգել է հայերեն։ Երգչուհին արժանացել է ՀԽՍՀ մշակույթի նախարարության Պետրոս Ադամյանի անվան մրցանակի (1981 թվականին):
