24.09c
Երեվան
երք, հլս 08
Սուրիա- Հալէպ դարձեալ յայտնուած է պաշարման օղակի տակ: Այս մասին «Արեւելք» իմացաւ Հալէպի իր աղբիւրներէն: Մեր աղբիւրը նաեւ նշեց, որ արդէն 5 -րդ օրն է որ Հալէպը սուրիական միւս նահանգներուն կապող Խանասէր գլխաւոր մայրուղին կը մնայ փակուած եւ ահաբեկիչ զինեալներու տիրապետութեան տակ: Պաշարման հետեւանքով կտրուկ աճ արձանագրած են առաջնային օգտագործման ապրանքատեսակներու գիները : Քաղաքը նաեւ զրկուած է ելեքդրականութեան եւ ջուրի մատակարարումներէն: Մեր աղբիւրը նաեւ նշեց, որ մեծ հրդեհ մը ծագած է քաղաքի «Ալ Րամուսա» կազի գլխաւոր գործարանին մէջ, որ նոյնպէս պատճառ դարձած է կազի մատակարարման դադրեցման: Մեր աղբիւրը հաղորդեց, որ բանակը թէժ մարտեր կը մղէ զինեալներու տիրապետութիւնէն ազատագրելու համար Խանասէր- Ասրիա մայրուղին: Կը հաղորդուի նաեւ, որ Տահէշ ահաբեկչական խմբաւորումը անձնասպանական գործողութիւն մը կատարած է Հալէպի հարաւը գտնուող Ասրիա հատուածին մէջ օգտագործելով 4 թոն պայթուցիկ նիւթ պարունակող բեռնատար կառք մը եւ պայթումին հետեւանքով յաջողած է գրաւել շրջանին մէջ գտնուող անցարգելային կէտը: Ըստ մեր աղբիւրին Հալէպի մէջ ապրուստի գնաճի տագնապը կրնայ ծանր հետեւանքներ ունենալ, եթէ Խանասէրի ճանապարհը մնայ փակ:
