-1.91c
Երեվան
ուրբ, դկտ 27
Իւրայատուկ եգիպտացի դերասան՝ Ահմատ Զաքի իր թուխ մաշկով եւ թախծոտ տարիներ շարունակ աչքերով գրաւած է միլիոնաւոր երկրպագուներու սիրտերը: Հակառակ, որ այնքան ալ գեղադէմ չէր, բայց անոր ձգտող հոգին, զգայնութիւնը եւ բարձրորակ տաղանդը պատճառ դարձած են յաջողութեան:
Այս մասին «Արեւելք» կը կարդայ «Մատա փոսթ» արաբական կայքէն:
Ահմատ Զաքի Ապտըլ Ալ Ռահման ծնած է 18 նոյեմբեր, 1949-ին: Հայրը կանուխէն մահացած է եւ մեծ հայրը խնամած զինք մօր վերամուսնութենէն ետք:
Դեռ դպրոցական օրերուն, տնօրէնը իր մէջ յայտնաբերած է դերասանական տաղանդ եւ քաջալերած որ յաճախէ Թատերական արուեստներու ակադեմիայ: Այնտեղ, ուսանողութեան օրերէն սկսած է մասնակցիլ թատրոններու՝ «Համատէ» եւ «Հէլլօ Շալապի» եւ գրաւած բոլորին ուշադրութիւնը: 1973-ին աւարտած է ակադեմիան հանդիսանալով իր տարեշրջանի առաջինը ու նետուած թատերական ասպարէզ:
Ահմատ Զաքի առաջին օրերէն իսկ դերեր ունեցած է հանրաճանաչ գործերու մէջ՝ ինչպիսին են ՝ «Մատրասաթ Մուշաղիպին»ը («Չարաճճիներուն դպրոցը»), «Ալ իյալ Քըպրէթ» («Զաւակները մեծցան») գործերը, բայց եւ այնպէս Զաքիի ճանաչում տուող դերը «Ալ Այամ» («Օրեր») տեսաշարին մէջ գրող՝Թահա Հուսէյնի կերպարն էր: Զաքի փայլած է նաեւ այլ ոճի՝ «Հուա ու Հիէ» (Արուն ու Էգը) երաժշտական զուարճալի տեսաշարին մէջ: Հակառակ անոր, որ Զաքի մեծ յաջողութիւններ արձանագրած է թատրոնին մէջ, բայց ան աւելի սիրած է շարժանկարը: 1972-ին իր առաջին մասնակցութիւնը բերած է «Ուալատի» («Զաւակս») շարժանկարին մէջ: Իսկ «Շաֆիքա ու Մութուալլի» շարժանկարը առաջինն էր, ուր Զաքի խաղացած է հիմնական հերոսի կերպարը:
Անոր դերակատարութիւնը որքան հարազատ էր այնքան ալ վտանգաւոր, մանաւանդ դժուար կերպարներ ներկայացուցած ատեն, որովհետեւ ապրումները կ'ազդէին անոր առողջութեան վրայ: Զաքի կատարած է բարդ կերպարներ, ինչպէս «Աղեքսանդրիա ինչու», «Ճամբուն վրայ թռչողը», «Սեւ վագրը», «Ընթրիքի ժամադրութիւն», եւ «Կարեւոր պատասխանատուի մը կինը» շարժանկարներուն մէջ: Ան նաեւ ներկայացուցած է նախագահ Սատաթի կերպարը «Սատաթի օրերը» շարժանկարով եւ նախագահ՝ Ժամալ Ապտ Ալ Նասէրի կերպարը «Նասէր 56» շարժանկարով, ինչպէս նաեւ երգիչ՝ Ապտ Ալ Հալիմ Հաֆէզի կերպարը «Հալիմ» շաժանկարով:
Զաքի ճշմարիտ ու իսկական կերպարներ մարմնաւորելու համար գացած է բարձրագոյն զոհողութիւններու: Ան թմրանիւթերով մոլիի մը կերպարը ներկայացնլու համար, իրապէս թմրանիւթեր օգտագործած է ու նկարահանուած այդ վիճակով, եւ շարժանակարը աւարտելէն ետք փոխադրուած է վերականգնողական կեդրոն հարկ եղած բուժումը ստանալու: Իսկ ուրիշ շարժանկարի մը մէջ ան իրապէս պառկած է դիահերձարանի սառնարանին մէջ, ուր զգացած է թէ կը մահանայ, երբ սրտի զարկերը սկսած են տկարանալ: Իսկ նախագահ Ապտ Ալ Նասէրի կերպարին համար, որ հասակով իրմէ բարձր էր եւ ունէր յատկանշական քալուածք մը, Զաքի ամբողջ ընթացքին ոտքի մատներուն վրայ մնացած է ու բացառիկ ձեւով, մարմանաւորելու համար մեծ գործիչ Ապտ ալ Նասէրը։
Աղբիւրը անդրադարձած է նաեւ Զաքիի արժանացած բազմաթիւ մրցանակներուն: Ան իր առաջին մրցանակը արժանացած է «Ճամբուն վրայ թռչող» շարժանկարին մէջ խաղացած դերին համար: Ապա արժանացած է 1989-ին Աղեքսանդրիա փառատօնին, 1990-ին Գահիրէի փառատօնի մրցանակներուն, իսկ 2001-ին լաւագոյն դերասանի մրցանակը Սատաթի կերպարին համար, եւ որուն համար ալ արժանացած է նաեւ նախագահական առաջին կարգի շքանշանին նախագահ Մուպարաքի կողմէ: Նաեւ արժանացած է 2002-ին Միջազգային Գահիրէի փառատօնի մրցանակին:
Ինչ կը վերաբերի իր անձնական կեանքին, ան սիրահարուած է ու ապա ամուսնացած դերասանուհի՝ Հալա Ֆուատին հետ: Սակայն ամուսնալուծուած են Զաքիի ապրած նախանձի պահերուն պատճառով ։Հակառակ ամուսնալուծման ան սիրած է իր կնոջ, եւ երբ վերջինս 1993-ին մահացած է քաղցկեղ հիւանդութենէ, Զաքի անցուցած է հոգեկան ծանր տագնապներ: Անոնք ունեցած են մէկ զաւակ՝ Հայսամ Ահմատ Զաքի, որ կեանքէն հեռացած է 2019-ին:
Զաքի որոշած է վերամուսնանալ իրմէ տարիքով մեծ երգչուհի՝ Ուարտա Ալժազարիին հետ, սակայն վերջինս մերժած է խուսափելով իր զաւակներու զայրոյթէն:
Ըստ աղբիւրին՝ Զաքի 18 տարի բնակած է Գահիրէի հիւրանոցներէն մէկուն մէջ, քանի մը տարի անգամ փոխելով իր սենեակը:
Մեծ դերասանը իր շատ ծխախոտ օգտագործելուն պատճառաւ տառապած է թոքերու քաղցկեղէ, ու պայքարած հիւանդութեան դէմ 9 ամիս: «Հալիմ» շարժանկարի նկարահանութեան ատեն, ան լացուցած է աշխատակազմը իր այնքան հարազատ դերակատարութեամբ, որովհետեւ Հալիմ ալ նոյն հիւանդութեամբ մահացած էր: Եգիպտոսի կառավարութեան հաշւոյն Զաքի բուժում ստացած է արտասահման ու վերադարձած իր վերջին օրերը անցնելու Եգիպտոսի «Տար Ալ Ֆուատ» հիւանդանոցին մէջ: Նշուած է նաեւ որ «Հալիմ» (Նուիրուած եգիպտացի մեծ երգիչ՝ Ապտըլ Հալիմ Հաֆէզին) շարժանկարի տեսարանի մը նկարահանման ատեն, բեմին վրայ Զաքի իր տեսողութիւնը կորսնցուցած է:
Ահմատ Զաքիի մահէն 16 տարի ետք, ան տակաւին ներկայ է իր գործերով, տակաւին փնտռուած է իր երկրպագուներուն կողմէ, եւ ան ամենատաղանդաւորն էր իր սերնդակիցներուն մէջ:
«Արեւելք»ի համար արաբերէնէ թարգմանեց ՝ Թ. Գ.
