13.09c
Երեվան
երկ, ապր 27
Մայիսի 25-ին Ն.Ս.Օ.Տ.Տ․ Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Հայաստանի Հանրապետութիւնում Ճապոնիայի նորանշանակ արտակարգ եւ լիազօր դեսպան Ֆուկուսիմայ Մասանորիին։
Հանդիպմանը Նորին Սրբութիւնն իր բարեմաղթանքները բերեց դեսպանին եւ յաջողութիւններ մաղթեց նրան իր առաքելութեան մէջ` կարեւորելով երկու պետութիւնների միջեւ հաստատուած սերտ համագործակցութիւնը: Վեհափառ Հայրապետը գոհունակութեամբ արձանագրեց նաեւ Մայր Աթոռի եւ Ճապոնիայի դեսպանութեան միջեւ ձեւաւորուած փոխգործակցային յարաբերութիւնները, մասնաւորապէս Մայր Աթոռի եւ թեմերի կողմից իրականացուող կրթական տարբեր ծրագրերին եւ մշակութային արժէքների պահպնութեանն ու խնամքի աշխատանքներում դեսպանատան կողմից ցուցաբերուած աջակցութիւնը։
Իր հերթին նորանշանակ դեսպանը հաւաստիացրեց Վեհափառ Հայրապետին, որ կ'անի առաւելագոյնը երկու ժողովուրդների կապերն առաւել սերտացնելու եւ ամրապնդելու գործում: Կարեւորելով երկու երկրների միջեւ առկայ կապերը՝ դեսպանը նշեց, որ Ճապոնիայի կառավարութիւնը պիտի շարունակի մարդասիրական զօրակցութիւն ցուցաբերել Հայաստանին։ Անդրադառնալով յետագայ ծրագրերին՝ դեսպան Մասանորին նշեց, որ ջանքեր պիտի գործադրի երկու երկրների միջեւ տնտեսական կապերի զօրացման եւ մշակութային ոլորտում գործակցութեան զարգացման ուղղութեամբ, յատուկ շեշտադրում պիտի կատարուի երիտասարդների շփման ծրագրերին։
Զրոյցի ընթացքում անդրադարձ կատարուեց Արցախի Հանրապետութեան դէմ Ադրբեջանի կողմից սանձազերծուած ռազմական գործողութիւններին, պատերազմի աղէտալի հետեւանքներին եւ առկայ մարտահրաւէրներին, ինչպէս նաեւ միջազգային հանրութեան արձագանքի անհրաժեշտութեանը։ Ամենայն Հայոց Կաթողիկոսը մասնաւորաբար կարեւորեց ճշմարտութեան բարձրաձայնումը նմանօրինակ արհաւիրքների կանխման համար՝ ընդգծելով, որ լռութիւնը կարող է ոճրագործութիւնների կրկնութեան պատճառ դառնալ։ Դեսպանը եւս ցաւ արտայայտեց այս կապակցութեամբ՝ նշելով, որ հակամարտութիւնների կարգաւորումն ընդունելի է միայն խաղաղ միջոցներով։
Հանդիպման առիթով Նորին Սրբութիւնն իր երախտագիտութիւնը յայտնեց այս դժուարին օրերին Ճապոնիայի կողմից Հայաստանին ցուցաբերուած զօրակցութեան համար:
