-2.91c
Երեվան
երկ, դկտ 23
Լույս է տեսել բժիշկ, հետազոտող, հավաքորդ, բազմաթիվ գրքերի հեղինակ Հարություն Մինասյանի հերթական գիրքը: Այն կրում է «Վրաստան. Հայ եւ ծագումով հայ բժիշկներ, Կենսագրական բառարան (480 անուն)» խորագիրը:
Ինչպես նշում է հեղինակը՝ գրքում այբբենական կարգով ներկայացված են նախասովետական, սովետական եւ անկախ Վրաստանի տարածքում երբևէ ապրած շուրջ 480 հայ եւ ծագումով հայ բժիշկների համառոտ կենսագրականներ:
Գիրքն ունի գիտահանրամատչելի բնույթ եւ նախատեսված է հայ բժշկության եւ Վրաստանի հայության պատմությունը ուսումնասիրող մասնագետների, ինչպես նաեւ ընթերցասեր լայն շրջանակների համար:
Հարություն Մինասյանն իր ուսումնասիրությունների ընթացքում հավաքել է Վրաստանում երբեւէ ապրած եւ աշխատած հայ բժիշկների ընդամենը մի փոքր մասի կենսագրականները:
Ուսումնասիրության ընթացքում, ինչպես նա է նշում, ոչ բոլոր անուններն է կարողացել ի մի բերել, որովհետեւ, ցավոք, գրական աղբյուրները (թերթեր, ամսագրեր, հանդեսներ, տեղեկատուներ եւ այլն) պահպանել են հիմնականում անվանի բժիշկների անունները:
Գրքում չեն ընդգրկվել բազմաթիվ հայ բժիշկներ, որոնց միայն ազգանուններն էին հայտնի եւ բառարանագիրը չի կարողացել գտնել նրանց մասին որեւէ կենսագրական տվյալ:
Արժեքավոր այս բառարանի համար հիմք են ծառայել նաեւ հեղինակի՝ Հարություն Մինասյանի հիմնած Հայ բժշկության թանգարանի երկար տարիների ընթացքում հավաքված արխիվային նյութերը:
«Արեւելք»-ը շնորհավորում է անվանի բժիշկ-գրողին՝ հերթական գրքի հրատարակության առթիվ:
