35.09c
Երեվան
չրք, հլս 15
Հայաստանի Հանրապետության արտաքին քաղաքական գերատեսչությունն իր պաշտոնական թվիթերյան էջում հայտարարություն է տարածել Գազայի հատվածում տեղի ունեցող զարգացումների վերաբերյալ:
«Մենք անհանգստացած ենք վերջին օրերին Գազայի հատվածում տեղի ունեցող զարգացումների առնչությամբ: Կողմերը պետք է ավելի շատ զսպվածություն և խոհեմություն դրսևորեն՝ իրավիճակի հետագա սրացումից խուսափելու համար: Մենք վերահաստատում ենք մեր դիրքորոշումն առ այն, որ տարաձայնությունները կարող են լուծվել բացառապես երկխոսության և բանակցությունների միջոցով»,-նշվում է հայտարարության տեքստում:
Հիշեցնենք, որ օրերս Իսրայելի բանակն անօդաչու թռչող սարքերի միջոցով արցունքաբեր գազ է կիրառել Գազայի հատվածի սահմանին հավաքված հազարավոր պաղեստինցի ցուցարարների դեմ: Սկզբում իսրայելական կողմը վերևից թռուցիկներ է նետել՝ պաղեստինցիներին նախազգուշացնելով սահմանից հեռու մնալ:
Դրանից հետո կիրառվել է արցունքաբեր գազ:
Այնուամենայնիվ, դա հետ չի պահել ցուցարարներին կրկին սահմանի մոտ հավաքվելուց: Ըստ աղբյուրի տվյալների՝ հավաքվել է ավելի քան 35.000 մարդ, որոնց դեմ արցունքաբեր գազից բացի նաև զենք է կիրառվել: Իսրայելցի ուժայինները կրակ են բացել բողոքի ցույցերի առավել ագրեսիվ մասնակիցների ուղղությամբ:
Հայտնի է, որ ցույցերի մասշտաբն ու վրդովմունքի ալիքը զգալիորեն մեծացել է Երուսաղեմում ամերիկյան դեսպանատան բացման ֆոնին:
Պաղեստինցի ցուցարարներն ինքնաշեն պայթուցիկ սարքեր և դյուրավառ հեղուկով շշեր են նետել, անվադողեր այրել և փորձել են կոտրել սահմանային արգելապատնեշները:
Հիշեցնենք, որ մայիսի 14-ին տեղի է ունեցել Երուսաղեմում ԱՄՆ դեսպանատան բացման արարողությունը, որին մասնակցելու նպատակով Իսրայել են ժամանել ԱՄՆ նախագահ Դոնալդ Թրամփի դուստր Իվանկան և նրա ամուսինը՝ Ջարեդ Քուշները, որոնք երկուսն էլ Սպիտակ տան ավագ խորհրդականներ են:
