19.09c
Երեվան
երկ, հկտ 19
Վերջերս Սուրիոյ մէջ ամուսնութիւններու գրանցման կեդրոններ սկսած են փութալ ոչ միայն երիտասարդ զոյգեր, այլեւ մեծ թիւով մեծահասակներ ու տարեցներ: Այս մասին կը յայտնէ «Ալ Ալամ» լրատուական կայքը:
Ըստ աղբիւրին, տարեցներու շարքին ամուսնութիւններու քանակը մեծապէս աճած է, որովհետեւ երկրի պատերազմական վիճակին հետեւանքով աճած է նաեւ այրիներու եւ ամուսնալուծուած կիներու թիւը: Կայ այլ պատճառ մը եւս, որ կապուած է երիտասարդ աղջիկը տարեց մարդու որպէս կին տուող ծնողներուն կողմէ փեսային հարստութենէն օգտուելու հեռանկարին:
Աղբիւրին փոխանցմամբ, վերջերս Ալ Նապք քաղաքին մէջ աննախադէպ ամուսնութիւն մը գրանցուած է, որ կրնայ եւ վերջինը չըլլալ, երբ 97 տարեկան տղամարդը դիմած է ամուսնութեան գրանցման կեդրոն, 42 տարեկան կնոջ հետ իր ամուսնութիւնը գրանցելու համար:
Այլ դէպքի մը յիշատակութեամբ մէջբերուած է 21-ամեայ համալսարանական ուսանողի մը պարտադիր ամուսնութիւնը 27-ամեայ իր ազգականին հետ, նպատակ ունենալով օգտուիլ աղջկան բաժին հասնելիք մեծ ժառանգութենէն:
Հոգեբաններու եւ ընկերաբաններու կարծիքով, մեծահասակներու ամուսնութիւնը հասարակութեան մէջ լայն տարածում գտած երեւոյթներէն է, որ ունի հոգեբանական, հասարակական եւ անձնական շարք մը պատճառներ, կապուած տարեցներուն եւ անոնց շրջապատի համոզմունքներուն հետ:
