18.09c
Երեվան
կրկ, ապր 26
Ռուս-թուրքական ներկա լարվածության ֆոնին Ռուսաստանը շարունակում է պատժամիջոցներ սահմանել Թուրքիայի նկատմամբ: Ռուսաստանում մինչև դեկտեմբերի 1-ը հրապարակվելու են այն ապրանքների ցանկը, որոնց ներմուծումը Թուրքիայից Ռուսաստան արգելվելու է: Պատժամիջոցներն իրենց բացասական ազդեցությունն են ունենում նաև այլ ոլորտների վրա: Ըստ սիրիահայ հրապարակախոս, պատերազմական լրագրող Սարգիս Գասարջյանի (Դամասկոս), այս ամեն ինչը անտրամաբանական հետևանքն է տեղի ունեցած անտրամաբանական քայլին, որն էր` Թուրքիայի կողմից ռուսական օդանավի կործանումը: «Իսկապես, ռուսական օդանավը խփելու գործողությունը տրամաբանությունից դուրս էր, ուստի հետևանքներն էլ անտրամաբանական են լինելու, և այս պահին ակնկալել, թե երկու երկրների տնտեսական, ռազմական, մշակութային կամ այլ կապերի ոլորտում ուրիշ ինչ քայլեր են սպասվում` դժվար է»,- «Արեւելքի» հետ զրույցում ասաց լրագրող Սարգիս Գասարջյանը: Ըստ նրա, քիչ թե շատ տրամաբանությանը մոտ զարգացում կարող է լինել այն, որ Թուրքիան, փոքրիկ քայլեր անելով, մեղմացնի իրավիճակը և գնա ներողություն խնդրելու ճանապարհով` այսպիսիով նախկինի վերադարձնելով թուրք-ռուսական հարաբերությունները: «Սակայն, Էրդողանը, հնարավոր է, դժվարությամբ «կոտրի» սուլթանի իր իմիջը և չգնա ուղղակի ներողամտության քայլին, սակայն ճկունություն ցուցաբերի և ներողամտության փոխարեն Սիրիայի հարցում ինչ-ինչ քարտեր բացի Ռուսաստանի առջև: Ասենք, դա կարող է լինել ակտիվ զինյալների հասցեներ տրամադրելու գամ գաղտնի սպասարկության որոշ տվյալներ Ռուսաստանին փոխանցելու ձևով: Դա կլինի ներողամտության փոխարեն ներքին կարգով արված մի քայլ, բայց իրեն ընտրած զանգվածի առջև դժվար թե Էրդողանը բառացի ներողություն խնդրի Ռուսաստանից»,-Ռուսաստանի և Թուրքիայի հարաբերությունների առաջիկա կանխատեսելի սցենարների մասին իր կարծիքը հայտնեց Սարգիս Գասարջյանը: Նա չի բացառում նաև, որ Թուրքիան կարող է մնալ նույն կարծր դիրքում և ներողություն չխնդրել: Այդ դեպքում, ըստ մեր զրուցակցի, Ռուսաստանի պատասխանն էլ նույնն է լինելու` Ռուսաստանը ավելի կուժեղացնի ճնշումները և կարող է հասնել նույնիսկ զինվորական բախումների: «Դա կլինի թե' օդանավերի կործանման ճանապարհով, թե' սիրիական հողում այն վայրերի ռմբակոծմամբ, որոնց պահպանության համաձանություն կար, և որոնք ռմբակոծման գոտուց դուրս էին: Այսինքն, հնարավոր է առաջիկայում խզվեն բոլոր տեսակի զինվորական համաձայնությունները»,-նշեց մեր զրուցակիցը:
Երկու երկրների ռազմական հարաբերությունների սրման առումով կա նաև հնարավոր մեկ այլ տարբերակ, որի մասին, ըստ մեր զրուցակցի, թեև շուտ է խոսել, բայց որը բնավ չի կարելի անտեսել: «Ռուսաստանը շատ հեշտությամբ կարող է Թուրքիային հարվածել ուղղակի քրդերի միջոցով` քուրդ զինյալներին որոշ նորագույն զինատեսակներ տրամադրելով, ինչը մեծ պրոբլեմներ կհարուցի երկրի ներսում»,-նշեց մեր զրուցակիցը:
Սարգիս Գասարջյանը հիշեցրեց օրերս թուրքական մամուլում հայտնված ռուս քաղաքական մի գործչի տեսակետ, ըստ որի, եթե Թուրքիան ռուսական նավերի դեմ փակի Բոսֆորը, ապա, ըստ ռուս գործչի, կարելի է խոսել աշխարհի վերջի մասին:
