19.09c
Երեվան
չրք, մյս 06
Այսօր առաւօտեան ժամերէն ի վեր քաղաքացիներու կուտակում նկատուած է Պէյրութի, ինչպէս նաեւ Լիբանանի տարբեր քաղաքներուն մէջ գտնուող լումայափոխներու խանութներուն առջեւ։
Այս մասին «Արեւելք» տեղեկութիւն ստացաւ Պէյրութի իր աղբիւրէն։
Մեր աղբիւրը նաեւ նշեց, որ վերջին օրերուն եղած կարգադրութեան հիմամբ քաղաքացիները կը կարողանան միայն 200 ամն տոլար գնել իւրաքանչիր տոլարին համար վճարելով 3900 լիբանանեան ոսկիի սակագին մը, մինչ դուրսը կամ ինչպէս ընդունուած է ըսել «սեւ շուկային» մէջ տոլարը կը վաճառուի 5000 լիբանանեան ոսկիի։
Կը նշուի նաեւ, որ ոչ բոլոր լումայափոխները կարելիութիւն ունին տոլար վաճառելու եւ այդ մէկը կ՚ընեն միայն այն լումայափոխները, որոնք ստացած են Կեդրոնական Դրամատան նեցուկը եւ այդ աջակցութիւնը կը կատարուի հերթափոխութեամբ։
Ըստ «Արեւելք»ի աղբիւրին քաղաքացիներու մեծ կուտակումներ երեւելի դարձած են նաեւ հայկական շրջաններուն եւ թաղամասերուն մէջ, ուր կը գործեն տասնեակ լումայափոխներ, որոնց մէջ ալ բնականաբար կան հայազգի լումայափոխներ։
Աւելի քան յստակ է, որ Պէյրութը հարուածող քաղաքական- տնտեսական տագնապը կրնայ յաւելեալ կերպով սրիլ, այնքան ժամանակ, որ քաղաքական լուծումներու հեռանկարը տակաւին կը յամենայ։
