28.09c
Երեվան
կրկ, սպտ 13
Ֆրանսահայ կազմակերպութիւնները համակարգող խորհուրդի համանախագահ, ՀՅԴ Բիւրոյի անդամ Մուրատ Փափազեան «Արմէնփրէս»ի հետ զրոյցին յայտնած է, թէ Ֆրանսայի մէջ Հայոց ցեղասպանութեան ժխտումին պատժելիութիւնը նախատեսող նոր օրինագիծը պէտք է իրաւական ամուր հիմքերու վրայ հիմնուած ըլլայ:
“Ինչպէս գիտէք, Ֆրանսայի նախագահ Ֆրանսուա Հոլանտ հաստատած է, որ Խորհրդարանին կը ներկայացուի Հայոց ցեղասպանութեան ժխտումի պատժելիութեան նոր օրինագիծ մը։ Նախագահ Հոլանտ օրինագիծին պատրաստութեան գործընթացը վստահած է Մարդկային Իրաւանց Եւրոպայի Ատեանի նախկին նախագահ Ժան-Փօլ Գոսթային։ Ան շատ լաւ մասնագէտ է, ծանօթ իրաւաբան։ Նախագիծին պատրաստութիւնը նախատեսուած է մինչեւ Ապրիլ եւ կառավարութիւնը զայն պիտի ներկայացնէ Խորհրդարանին”, ըսած է Փափազեան, աւելցնելով, որ տասը տարի է այս խնդրին ուղղութեամբ կ՚աշխատին եւ կ՚ուզեն, որ այս տարի ան վերջնական լուծում ստանայ: Մուրատ Փափազեանի համաձայն, պէտք է նոր օրինագիծը իրաւական ամուր հիմքերու վրայ հիմնուած ըլլայ, որպէսզի Սահմանադրական խորհուրդը զայն չբեկանէ:
“Երբ Խորհրդարանը օրինագիծը քննարկէ եւ հաստատէ, ատկէ յետոյ մեր թշնամիները անպայման հարցը պիտի տանին Սահմանադրական խորհուրդ, ինչպէս եղաւ 2012ին։ Հետեւաբար ամուր իրաւական հիմքեր պէտք են, որպէսզի խորհուրդը զայն չբեկանէ”, աւելցուցած է ան:
Ան տեղեկացուցած է նաեւ որ Արցախի հարցին առընչուող լուրջ աշխատանք պիտի տարուի, որպէսզի յաջողութիւններ արձանագրուին Արցախի ճանաչման գծով:
“Չենք կրնար ըսել, որ Արցախը այս տարի կը ճանչուի, բայց գոնէ որոշ հանգրուանի պէտք է հասնինք, դէպի յառաջ քայլ պէտք է արձանագրուի։ Գիտենք, որ կը խօսուի ղարաբաղեան խնդրին առընչուող նոր առաջարկներու մասին։ Չենք կրնար ըսել, որ լաւատես ենք, վերջնական լուծում կը գտնուի, սակայն դէպի խաղաղութիւն որեւէ քայլ պէտք է արձանագրել”, ըսած է Ֆրանսահայ կազմակերպութիւնները համակարգող խորհուրդի համանախագահը:
Մուրատ Փափազեան նշած է, որ կը նկատուի ֆրանսացի երեսփոխաններու աշխատանք Արցախի հետ: “Կազմակերպուած են այցելութիւններ Արցախ, եւ տեղւոյն վրայ խնդրին, իրավիճակին ծանօթանալէ ետք պատկերացումները փոխուած են։ Այս տարի նոյնպէս կը նախատեսենք տարբեր խումբերու այցելութիւններ կազմակերպել դէպի Արցախ”, աւելցուցած ան:
Ֆրանսահայութեան համար յաջորդ կարեւոր հարցը սուրիահայութեան զօրակցիլն է: “Սուրիահայութեան վիճակը ծանր է, շատ կարեւոր է մեր ազգակիցներուն աջակցիլը։ Ֆրանսայի հայկական համայնքը իր զօրակցութիւնը կը բերէ, որպէսզի փրկուի Սուրիոյ համայնքը։ Աջակցութիւնը կ՚ըլլայ թէ՛ ֆինանսական, թէ՛ մեր կապերու տեսքով”, ըսած է Մուրատ Փափազեան, նշելով, որ Ֆրանսա այդքան ալ շատ սուրիահայեր չեն գար, իսկ եկողներն ալ ընդհանրապէս հոս հարազատներ ունին:
