4.09c
Երեվան
երկ, մրտ 10
Մեսրոպեանը Առաջատար՝ Կրթական Նորարարութիւններու Մէջ
Հայ կաթողիկէ Մեսրոպեան բարձրագոյն վարժարանը եւս մէկ անգամ կը հաստատէ իր առաջատար դիրքը Լիբանանի կրթական կեանքին մէջ՝ ներդնելով նորագոյն արհեստագիտութիւնները ուսումնառութեան գործընթացին մէջ: Վարժարանը, Պօղոսեան հիմնադրամին աջակցութեամբ եւ քաջալերանքով, ձեռք բերաւ 17 հատ Meta Quest 3S սարքեր, որոնք պիտի ծառայեն կրթութեան նոր, արդիական ու ներգրաւիչ փորձառութիւն ապահովելուն:
Virtual Reality-ի (VR) այս սարքերը պիտի օգտագործուին զանազան դասարաններու աշակերտներուն կողմէ՝ տարբեր առարկաներու ուսումնասիրման համար: Այս նորարարական նախաձեռնութիւնը նպատակ ունի խորացնելու գիտելիքներու ընկալումը՝ աշակերտներուն ընձեռելով հնարաւորութիւն անմիջականօրէն մասնակից դառնալու ուսումնական գործընթացին՝ 3D եւ ներգրաւիչ միջավայրի մը մէջ:
VR-ի Կարեւորութիւնը Կրթութեան Մէջ
Virtual Reality-ի արհեստագիտութիւնը արդէն իսկ համաշխարհային մակարդակով մեծ տարածում գտած է կրթութեան ոլորտին մէջ՝ շնորհիւ իր բազմակողմանի հնարաւորութիւններուն։
VR-ը առարկաները կը դարձնէ աւելի դիւրաւ ընկալելի՝ շնորհիւ եռաչափ պատկերներու եւ շօշափելի փորձառութեան: Օրինակ՝ աշակերտները կրնան ուսումնասիրել մարմնի կազմախօսութիւնը կամ շրջագայիլ պատմական վայրերու մէջ առանց ֆիզիքապէս հոն գտնուելու: Անիկա կը նպաստէ գործնական մտածողութեան զարգացման, ուսումնառութիւնը կը դարձնէ աւելի հետաքրքրական եւ ներգրաւիչ, կը խթանէ աշակերտներու խանդավառութիւնը եւ կ՛ընդլայնէ անոնց մասնակցութիւնը դասընթացքներուն:
Առաջին Փորձարկումները
5 Մարտ 2025-ին, Meta Quest 3S սարքերուն փորձարկումը կատարուեցաւ Մեսրոպեան վարժարանին մէջ, Meta-ի ներկայացուցիչ՝ EDU VENTURE ընկերութեան աշխատակիցներուն առաջնորդութեամբ։ Վարժարանի տնօրէն պարոն Կրէկուար Գալուստի գլխաւորութեամբ, կրթական պատասխանատուները, ուսուցիչները եւ զանազան դասարաններու աշակերտներ ծանօթացան սարքերուն հնարաւորութիւններուն եւ գործնական կիրառութիւններուն:
Սարքերը արդէն իսկ կը պարունակեն համապատասխան կրթական ծրագիրներ, որոնք նախատեսուած են բազմաթիւ առարկաներու ուսուցման համար: Այս ծրագիրներու ներդրումը կը նպաստէ, որ ուսուցումը դուրս գայ դասագիրքերու սահմաններէն եւ վերածուի կենդանի փորձառութեան:
Մեսրոպեան բարձրագոյն վարժարանը կը շարունակէ իր առաքելութիւնը՝ կրթութիւնը դարձնելով աւելի արդիւնաւէտ, հետաքրքրական եւ ժամանակակից, պատրաստելով ուսանողներ, որոնք կրնան համաքայլ ընթանալ 21-րդ դարու կրթական պահանջներուն:
Այս առիթով, Մեսրոպեան վարժարանը անգամ մը եւս իր խորին շնորհակալութիւնը կը յայտնէ Պօղոսեան հիմնադրամին, որ միշտ ալ զօրավիգ եղած է վարժարանին տասնամեակներու ընթացքին, յատկապէս նորարար ծրագիրներու իրագործման մէջ:
.png)
.png)
.png)
.png)
