10.09c
Երեվան
ուրբ, մրտ 13
Իսրայէլ հարուածած է Պէյրութի հիւսիսային ծայրամասը գտնուող Նապաա շրջանի շէնքերէն մէկը, որու հետեւանքով բնակարաններէն մէկուն մէջ հրդեհ բռնկած է։ Նապաա շրջանը կը գտնուի Պուրճ Համուտ թաղամասին անմիջական հարեւանութեամբ, որուն բնակչութեան մեծամասնութիւնը հայեր են։
«Արմէնփրէս»-ի հետ ունեցած զրոյցին Պէյրութի հայկական «Ազդակ» օրաթերթի գլխաւոր խմբագիր Շահան Գանտահարեան տեղեկութիւններ հաղորդած է այս առնչութեամբ՝ նշելով, որ վերջին օրերու ռազմական գործողութիւններու ընթացքին, ինչպէս նաեւ «Հըզպալլա»-ի եւ Իսրայէլի միջեւ 2024 թուականի հակամարտութենէն ի վեր առաջին անգամ հրթիռակոծուած է Պէյրութի հայկական թաղամասին մօտիկ գտնուող բնակելի թաղամասը։
«Բարեբախտաբար, լիբանանահայերու մէջ զոհեր եւ վիրաւորներ չկան, սակայն մեզ շատ կը մտահոգէ այն իրողութիւնը, որ թիրախ դարձած է Պուրճ Համուտի յարակից տարածքը։ Հրթիռակոծումը բաւական մօտ եղած է մեր թաղամասին։ Հարուածէն տուժած բնակարանին մէջ եւս հայեր չեն եղած։ Շրջանառուող տեղեկութիւններուն համաձայն՝ իսրայէլեան կողմը թիրախ դարձուցած է այն բնակարանը, ուր կը բնակէր «Հըզպալլա»-ի անդամներէն մէկը, որ յատուկ նշանակութիւն ունէր Իսրայէլի համար»,– ըսած է Գանտահարեան։
Ան վստահեցուցած է, որ խուճապային տրամադրութիւններ չկան, սակայն անորոշութիւն կը տիրէ, որ մեծ անհանգստութիւն կը պատճառէ բնակիչներուն։
«Լիբանանի կառավարութիւնը պաշտօնապէս յայտարարած է, որ պատրաստ է ուղիղ բանակցութիւններ վարելու իսրայէլեան կողմի հետ եւ նոյնիսկ կը փափաքի պատուիրակութիւն կազմել՝ Կիպրոսի մէջ հանդիպում ունենալու համար, սակայն այդ հարցով ալ դեռ յստակութիւն չկայ։ Փոխարէնը՝ հրթիռակոծումները սաստկացած են։ Իսրայէլը նպատակ դրած է անվտանգութեան գօտի ստեղծել Լիբանանի հետ սահմանագիծի երկայնքով, եւ նոյնիսկ կը նախատեսուի այս ծրագիրը իրագործել Լիբանանի տարածք ներխուժելով։ Շատ բարդ իրավիճակ է, եւ հանգուցալուծման որեւէ նախադրեալ տակաւին չի նշմարուիր»,– յայտնած է Գանտահարեան։
