13.06c
Երեվան
ուրբ, ապր 10
Մոժթապա Խամենէի յայտարարած է, որ իր ընտրութեան մասին տեղեկացած է հեռատեսիլով։ Այս մասին կը հաղորդեն լրատուամիջոցները։
Իրանի գերագոյն առաջնորդ այաթոլլա Մոժթապա Խամենէի իր առաջին ելոյթի ընթացքին երախտագիտութիւն յայտնած է երկրի մարտիկներուն, կը հաղորդէ Tasnim-ը։
«Իմ ելոյթի երրորդ մասը անկեղծ երախտագիտութիւն մըն է մեր քաջարի մարտիկներուն, որոնք ստեղծուած պայմաններուն մէջ, երբ ճակատի ամբարտաւան առաջնորդները անմեղօրէն կը յարձակին մեր ազգի եւ սիրելի հայրենիքի վրայ, իրենց ջախջախիչ հարուածներով փակած են թշնամիին ճամբան՝ ցրելով անոնց այն պատրանքը, որ կրնան գերիշխել մեր սիրելի հայրենիքին վրայ եւ, հնարաւոր է, նոյնիսկ մասնատել զայն»,– նշած է այաթոլլա Խամենէին։
Ան աւելցուցած է, որ զանգուածներու կամքն է շարունակել երկրի արդիւնաւէտ եւ անողոք պաշտպանութիւնը։
«Նմանապէս, Հորմուզի նեղուցը փակելու լծակը, անկասկած, պէտք է շարունակուի։ Այլ ճակատներ բանալու վերաբերեալ հետազօտութիւններ կատարուած են, ուր թշնամին քիչ փորձ ունի եւ չափազանց խոցելի կրնայ ըլլալ, եւ անոնց գործարկումը պիտի քննարկուի, եթէ ռազմական իրավիճակը շարունակուի եւ նպատակայարմար ըլլայ»,– ըսած է Իրանի գերագոյն առաջնորդը։
Այաթոլլա Խամենէին նաեւ երախտագիտութիւն յայտնած է «Դիմադրութեան ճակատին»՝ լիբանանեան «Հըզպալլա» շարժման եւ «Իրաքի իսլամական դիմադրութեան»՝ Միացեալ Նահանգներու եւ Իսրայէլի հետ հակամարտութեան մէջ Թեհրանին աջակցելու համար։
«Մենք Դիմադրութեան ճակատի երկիրները կը համարենք մեր լաւագոյն բարեկամները, իսկ դիմադրութեան գործն ու Դիմադրութեան ճակատը Իսլամական յեղափոխութեան արժէքներու անբաժանելի մասը կը կազմեն։ Անկասկած, այս ճակատի բաղադրիչներու փոխադարձ համագործակցութիւնը կը կրճատէ սիոնիստական ապստամբութենէն փրկութեան ճանապարհը, ինչպէս որ տեսած ենք, թէ ինչպէս քաջարի եւ հաւատարիմ Եմէնը կը շարունակէ պաշտպանել Կազայի ճնշուած ժողովուրդը, եւ հաւատարիմ «Հըզպալլա»ն, հակառակ բոլոր խոչընդոտներուն, օգնութեան կը հասնի Իսլամական Հանրապետութեան։ Իրաքի դիմադրութիւնը եւս քաջաբար անցած է նոյն ճանապարհով»,– իր ելոյթին մէջ նշած է Իրանի գերագոյն առաջնորդը։
Յիշեցնենք, որ Իրանի նոր գերագոյն առաջնորդ Մոժթապա Խամենէիի ուղերձը փոխանցած է Իրանի պետական հեռատեսիլի հաղորդավարը։
