9.09c
Երեվան
հնգ, մյս 07
2021 թվականի բժշկության ոլորտի մրցանակակրի՝ Արտեմ Փաթափությանի ծնողները՝ գրող Սարգիս Փաթափությանը (Սարգիս Վահագն) եւ նրա կինը, փոխադրվել են ԱՄՆ-ի «Արարատ» տարեցների տուն: Որոշումը կայացրել են իրենք՝ 95-ամյա Սարգիս Վահագնը ու կինը:
Գրողն իրենց բնակավայրի փոփոխության լուրը հայտնել է Ֆեսյբուքում, գրելով, որ տարիների բեռն է ստիպել իրենց ապաստանելու խնամքի այդ կենտրոնում. «Մտահոգվելու կարիք չկա. սքանչելի հանգստավայր է՝ կենցաղային բոլոր շնորհներով օժտված»,-հայտնել է Սարգիս Վահագնը: Նա իր ծանոթներին տեղեկացրել է նաեւ, թե ԱՄՆ-ի հայկական տարեցների այդ տան ո՛ր սենյակում են ապրելու իրենք (204), նշել է իր հեռախոսի նոր համարները եւ մեյլը:
«Արարատ տունը» հիմնվել է մոտ 70 տարի առաջ՝ նպատակ ունենալով խնամք եւ բժշկական ծառայություններ տրամադրել կարիք ունեցող հայ ծերերի: Նպատակներից մեկն էլ նրանց համար հայկական միջավայրում ընտանեկան մթնոլորտ ապահովելն է եղել: Այժմ տարեցների տունը Լոս Անջելեսում մի քանի մասնաճյուղ ունի, որոնցում հայ տարեց բնակիչների համար ստեղծված են լավագույն պայմանները:
Սարգիս Վահագնը գրող, թարգմանիչ, խմբագիր, թատերագիր եւ վիպագիր է:
Ավարտել է Բեյրութի ֆրանսիական լիցեյը՝ առեւտրի եւ հաշվապահության գծով։ Ստեղծագործել սկսել է պատանի տարիքից: 1987 թ.-ից բնակվում եւ ստեղծագործում է Լոս Անջելեսում: Բազմաթիվ գրքերի հեղինակ է:
Այս տարի Երեւանում լույս տեսավ նրա «Արշիլ Գորկի» վեպը, որի համար գրողն արժանացել է ՀՀ-ի Թեքեյան Մշակութային Միության գրական եւ «Հայկաշեն Ուզունյան» մրցանակներին։ Նա ունի երկու որդի, որոնք բնակվում են Սան Դիեգոյում:
