«Մենք դէմ ենք տարածաշրջանին մէջ աշխարհաքաղաքական որեւէ փոփոխութեան». Ապտոլլահեան

«Մենք դէմ ենք  տարածաշրջանին մէջ աշխարհաքաղաքական որեւէ փոփոխութեան». Ապտոլլահեան

Իրանի արտաքին գործոց նախարար Հոսէյն Ամիր Ապտոլլահեան թուրք գործընկեր Հաքան Ֆիտանի հետ համատեղ մամուլի ասուլիսին յայտարարած է, որ Իրանը կ'ողջունէ Երեւանի եւ Պաքուի միջեւ բանակցութիւնները եւ չընդունիր աշխարհաքաղաքական որեւէ փոփոխութիւն տարածաշրջանին մէջ, յայտնած է IRNA-ն։

Ինչ կը վերաբերի կովկասեան հարցին, ապա ե՛ւ Իրանը, ե՛ւ Թուրքիան համակարծիք եղած են, որ լարուածութեան եւ հակամարտութիւններու դարաշրջանը աւարտած է, եւ այժմ եկած է համագործակցութեան ժամանակը, ըսած է Ամիր Ապտոլլահեանը։

«Մենք կ'ողջունենք Երեւանի եւ Պաքուի միջեւ բանակցութիւնները եւ պիտի չընդունինք տարածաշրջանին մէջ աշխարհաքաղաքական որեւէ փոփոխութիւն եւ տարածաշրջանին մէջ առկայ տարանցիկ երթուղիի արգելափակումը», - ընդգծած է Իրանի արտաքին գործոց նախարարը։

Ան նաեւ նշած է, որ ինքը եւ իր թուրք գործընկերը պայմանաւորուած են Իրանի, Թուրքիոյ եւ Ատրպէյճանի ձեւաչափի շուրջ, որ առաջարկուած է Թուրքիոյ արտաքին գործոց նախարարի կողմէ՝  կովկասեան տարածաշրջանին մէջ խաղաղութեան եւ կայունութեան ապահովման օժանդակելու համար։

Յիշեցնենք, որ 3 օգոստոսին Ֆիտան Թուրքիոյ ԱԳՆ ղեկավարի պաշտօնին իր առաջին այցը կատարած է Իրան։