11.09c
Երեվան
շբթ, մյս 16
Օրերս կեանքէն հեռացաւ Թուրքիոյ «Սաատէթ» («Երջանկութիւն) կուսակցութեան խորհուրդի նախագահ՝ հայկական ծագումով՝ 86 տարեկան Օղուժան Ասիլթուրք: Այս մասին «Արեւելք» տեղեկացաւ Ermenihaber կայքէն:
Ըստ աղբիւրին Ասիլթուրք 13 սեպտեմբերին իր կնոջ հետ փոխադրուած է հիւանդանոց թոքաբորբի ծանր վիճակով, եւ կասկածուած է, որ անոնք վարակուած են Քովիտի վարակով:
Օղուժան Ասիլթուրք, ծնած է 25 Մայիս, 1935-ին, աւարտած է Պոլսոյ համալսարանի երկրաչափական ճիւղը:
Աշխատած է որպէս ազատ խորհրդատու երկրաչափ: Եղած է Մալաթիոյ պատգամաւոր : Նաեւ աշխատած է Ներքին գործոց արդիւնաբերութեան եւ արհեստագիտութեան նախարարութիւն: Ան դատուած է ու արդարացուած: Զրկուած է քաղաքականութեամբ զբաղելէ 10 տարիով:
1987-ին երբ Թուրքիոյ մէջ հանրաքուէով վերացուած են սահմանափակումները, «Բարօրութիւն» կուսակցութեան առաջին համագումարը տեղի ունեցած է ու ան ընտրուած կուսակցութեան քարտուղարը:
Ասիլթուրք եղած է «Երջանկութիւն» կուսակցութեան հիմնադիրներէն մէկը եւ ընտրուած խորհուրդի նախագահ:
Աղբիւրը նշած է նաեւ, որ «Արդարութիւն եւ Բարգաւաճում» կուսակցութեան նախկին պատգամաւոր՝ Ֆէյզի Իշպարան իր թուիթըրեան էջին վրայ գրած է թէ Օղուճան Ասիլթուրքի իսկական անունը Տուրմուշ Տուրտույեան է եւ որ 52 տարի առաջ, երբ ան 34 տարեկան էր դատարանի միջոցաւ փոխած է անունը, եւ միայն անկէ ետք քաղաքականութեան մէջ վերելք արձանագրած:
Իշպարան նաեւ գրած է, թէ «ես երբեք չեմ ցանկացած գրել սա, բայց կ'ուզեմ պատմել Թուրքիոյ դառն ճշմարտութիւնը:
Իրականութեան մէջ, Տուրմուշ Տուրտույեան, Օզալին, Տեմիրելին, Էրպաքանին պէս, ITU- էն էր, բայց որպէս hայ անոնց պէս բախտաւոր չէր եւ չկրցաւ լաւ աշխատանք ստանալ նահանգին մէջ:
Սակայն երբ Տուրմուշը Օղուժան դարձաւ, դռները բացուեցան իր առջեւ»:
