5.09c
Երեվան
ուրբ, նմբ 08
Ինը օրուան սկաուտական յայտագիրներէ, մրցանքներէ, մշակութային ճոխ առօրեայէ եւ բանակավայրէն դուրս կատարուած այցելութիւններէ ետք, շաբաթ, 29 յուլիսի երեկոյեան ժամը 6:00-ին, Բիւրականի «Գառնիկ Մկրտիչեան» բանակավայրին մէջ իր աշխատանքները աւարտեց համա-ՀՄԸՄ-ական 12-րդ բանակումը, յիշատակելի նոր էջ մը աւելցնելով 105-ամեայ ՀՄԸՄ-ի արդի պատմութեան մէջ:
Համա-ՀՄԸՄ-ական 12-րդ բանակումին փակման հանդիսաւոր արարողութիւնը կատարուեցաւ ներկայութեամբ ՀՄԸՄ-ի Կեդրոնական վարչութեան ատենապետ Վաչէ Նաճարեանի, Կեդրոնական վարչութեան անդամներ Վիգէն Աւագեանի, Օշին Փիրումեանի, Դաւիթ Յակոբեանի, Արմանտ Քիլիճեանի, Ֆետի Խաժակ Գազանճեանի եւ Թալին Օրտողլեանի:
Իրենց ներկայութեամբ համա-ՀՄԸՄ-ական բանակումի փակման արարողութիւնը պատուեցին ՀՅԴ Բիւրոյի անդամ Կիրօ Մանոյեան, Համազգայինի Կեդրոնական վարչութեան անդամ Տիգրան Պապիկեան, Իրանի Հայ մշակութային «Արարատ» կազմակերպութեան ատենապետ Սոֆի Ջաղարբէկեան, ՀՕՄ-ի Հայաստանի Շրջանային վարչութեան ատենապետ Մարօ Քէշիշեան, ՀՄԸՄ-ի Կեդրոնական վարչութեան նախկին անդամներ Բագրատ Եսայեան եւ Իշխան Եղիայեան, ՀՄԸՄ-ի Կեդրոնական վարչութեան նախկին ատենապետ Գառնիկ Մկրտիչեանի ընտանեկան պարագաներ, ազգային բարերար Գաբրիէլ Չէմպէրճեան, ՀՄԸՄ-ի բարեկամներ եւ արտասահմանէն ժամանած մեծաթիւ ծնողներ:
Փակման արարողութիւնը ընթացք առաւ Հայաստանի եւ Արցախի քայլերգներուն կատարողութեամբ եւ բանակումի հերթապահ Արամ Գայսէրեանի ողջոյնի կարճ խօսքով:
Բանակումի Ընդհանուր Խմբապետին Խօսքը
Փակման արարողութեան առաջին խօսքը արտասանեց ընդհանուր խմբապետ Պօղոս Մահպուպեան: Ան արժեւորումը կատարեց բանակումին իննօրեայ աշխատանքներուն եւ նշեց, որ այսուհետեւ բանակումին մասնակիցները կը պարտաւորուին իրենց յիշատակները եւ ՀՄԸՄ-ի վեհ նպատակը տարածել իրենց շրջաններուն մէջ:
Իր խօսքը բանակող սկաուտներուն ուղղելով` Պօղոս Մահպուպեան ըսաւ. «ՀՄԸՄ-ի նպատակին անմար ջահը այս պահէն սկսեալ ձեզի կը փոխանցենք, որպէսզի ձեր կարգին շարունակէք երթը եւ զայն փոխանցէք յաջորդող սերունդներուն: Կը խորհինք, թէ պիտի դառնաք արժանի յանձնառուները ձեզի տրուած այս իրաւունքին: Շարունակեցէ՛ք երթը ձեր անձնական երազները իրականացնելով, եւ թող ՀՄԸՄ-ի սկաուտական դաւանանքը դառնայ ձեր մշտական ուղեցոյցը»:
Իբրեւ վերջին հրահանգ, Պօղոս Մահպուպեան թելադրեց. «Խստօրէն արգիլուած է ձեր եռանդը կորսնցնել: Մի՛ վախնաք մեծ երազելէ: Երազելը շատ լաւ բան է: Սակայն պէտք է զգուշանալ, որովհետեւ… երբեմն-երբեմն երազները կրնան իրականանալ»:
«Արարատեան» Կարգի Տուչութիւն
Այս առիթով կատարուեցաւ ՀՄԸՄ-ի սկաուտական բարձրագոյն կարգի տուչութիւն 34 քոյր-եղբայրներու, որոնք անցնող երկուքուկէս տարիներուն առցանց դասախօսութիւններով, ապա` բանակումի ընթացքին մէկ օրուան վրայ երկարած յատուկ հանդիպումով տիրացան «Արարատեան» կարգի գիտելիքներուն, մշակեցին եւ գործադրեցին սկաուտական ծրագիրներ եւ ի վերջոյ արժանացան իրենց աշխատանքին արդար արգասիքը նկատուող «Արարատեան» կարգի փողկապին եւ մետալին, զորս փակման արարողութեան ընթացքին ստացան ՀՄԸՄ-ի Կեդրոնական վարչութեան անդամներու կողմէ:
ՀՄԸՄ–ՀԱՍԿ–ի Վարչութեան Խօսքը
ՀՄԸՄ-ՀԱՍԿ-ի խօսքը ուղղեց վարչութեան ատենապետ Սանտրա Վարդանեան: Ան նշեց, որ ընկալեալ սովորութիւն է եւ ՀՄԸՄ-ական բարձր գիտակցութեան դրսեւորում է կրկնել, թէ միութենական աշխատանքի համար պէտք չէ շնորհակալութիւն յայտնել, բայց ես կը փափաքիմ ՀՄԸՄ-ՀԱՍԿ-ի վարչութեան անունով շնորհակալութիւն յայտնել այն բոլոր ՀՄԸՄ-ականներուն, որոնք իրենց պարտականութեան բարձր գիտակցութեամբ, ամիսներ շարունակ եւ բանակումի ընթացքին, աշխատեցան հայրենիքի եւ Արցախի այս չափազանց բարդ պայմաններուն մէջ կազմակերպելու եւ իրականութիւն դարձնելու համար համա-ՀՄԸՄ-ական 12-րդ բանակումը:
Շարունակելով, Սանտրա Վարդանեան շնորհակալութիւն յայտնեց այն եզակի համախմբումին համար, որ կրնայ ապահովել միայն ՀՄԸՄ-ի նման համաշխարհային կազմակերպութիւն մը, եւ որուն շնորհիւ մենք` ՀՄԸՄ-ականներս անգամ մը եւս փաստեցինք, որ Հայաստան-Արցախ-սփիւռք եռամիասնութիւնը ո՛չ մէկ իրավիճակ եւ ո՛չ մէկ իշխանութիւն կրնայ սասանել: Մենք` ՀՄԸՄ-ականներս, ինչպէս բանակումին կարգախօսը կը յուշէ, խրոխտ ենք, խիզախ ենք եւ մի՛շտ պատրաստ դիմագրաւելու մարտահրաւէրները ու խնդիրները, աւելի մեծ եւ կարեւոր նպատակներու իրագործման ճամբուն վրայ:
ՀՄԸՄ-ՀԱՍԿ-ի ատենապետը մաղթեց, որ բանակողները հայրենիքէն իրենց հետ տանին նոր լիցքեր, եռանդ ու խինդ, աւելի մեծ նուիրումով կատարելու ՀՄԸՄ-ականի իրենց պարտականութիւնները: «Կը փափաքիմ դարձեալ յիշեցնել, որ ձեզմէ իւրաքանչիւրը պիտի ըլլայ Հայաստանի եւ Արցախի ներկայացուցիչը իր շրջապատին մէջ` կոտրելով այն լռութիւնը, որ որդեգրուած է, բարձրաձայնելու այն խնդիրները, որոնք այս պահուն կը դիմագրաւեն մեր քոյրերն ու եղբայրները Արցախի մէջ եւ անդրադառնալու այն բոլորին, ինչ որ կը կատարուի մեր հայրենիքին շուրջ», հաստատեց Սանտրա Վարդանեան:
Յուշանուէրներու Բաշխում
Փակման արարողութիւնը ընդգրկեց յուշանուէրներու բաշխում` քանի մը փուլով: Նախ, բանակումին նշանակով յուշանուէրներ յանձնուեցան բանակումի օժանդակ մարմինի անդամներուն եւ բժշկական անձնակազմին: Ապա, ՀՄԸՄ-ի Կեդրոնական վարչութիւնը յուշանուէրներու փոխանակում կատարեց մասնակից պատուիրակութիւններու խմբապետներուն հետ: Իսկ երրորդ փուլով, Կեդրոնական վարչութիւնը յուշանուէրներ յանձնեց բանակումի գործադիր մարմինի եւ խմբապետական կազմի անդամներուն եւ փակման արարողութեան ներկայ հիւրերուն:
Կեդրոնական Վարչութեան Սկաուտականի
Ներկայացուցիչին Խօսքը
Խօսք առաւ ՀՄԸՄ-ի Կեդրոնական վարչութեան սկաուտականի ներկայացուցիչ Ֆետի Խաժակ Գազանճեան եւ բանակումի իննօրեայ յայտագիրները ներկայացնելով յայտնեց, որ «այս բոլորը կատարուեցան եւ պիտի շարունակուին կատարուիլ համա-ՀՄԸՄ-ական մեծ ջանքով եւ շրջաններու հսկայական ճիգով, մէկ հիմնական նպատակ ունենալով` մեր մէջ միշտ վառ պահել հայու ոգին, հայութեան պատկանելիութիւնը, հայ մշակոյթը, հայ լեզուն եւ հայութեան ու հայրենիքին համար զոհուած տղոց յիշատակը»:
Ֆետի Խաժակ Գազանճեան յատուկ կերպով յիշեց ՀՄԸՄ-ի Արցախի սկաուտները, որոնք թշնամական պաշարումի պատճառով զրկուեցան բանակումի մասնակցութեան իրաւունքէն: Ան ըսաւ. «Արցախի՛ սկաուտներ, դուք մեր առօրեայ հանդիպումներուն, աշխատանքներուն, խարուկահանդէսներուն ընթացքին հոգիով ու սրտով մեզի հետ էիք, յոյսով ենք, որ յառաջիկայ ծրագիրներուն անպայման կը միանանք ֆիզիքապէս»: Ֆետի Խաժակ Գազանճեան գնահատեց նաեւ բանակումի յաջողութեան համար ՀՄԸՄ-ՀԱՍԿ-ի ի գործ դրած ճիգերը եւ դրուատիքի խօսքեր արտասանեց բանակողներուն, որոնք կարողացան շաղուիլ յատուկ խնամքի կարօտ «Հրաշք» պատանի եւ երիտասարդ տղոց ու աղջիկներուն հետ, ստեղծել ընկերային մթնոլորտ եւ սկաուտական ոգիով գործակցիլ միասնաբար:
Ապա, Ֆետի Խաժակ Գազանճեան շնորհակալութիւն յայտնեց բանակումի յաջողութեան նպաստած խմբապետական կազմին եւ գործադիր մարմնի խմբապետներուն, որոնք «աշխատեցան եւ ծառայեցին անխնայ, բանակումի ընթացքին ստեղծեցին ամուր շղթայ մը, զոր երբեք կարելի չէր կոտրել` ի պատիւ իրենց մէջ տիրող համագործակցութեան ոգիին. անոնք ի սպաս դրին իրենց բոլոր գիտելիքները եւ փորձառութիւնները, զորս ստացած էին իրենց շրջաններէն եւ համա-ՀՄԸՄ-ական 12-րդ բանակումը յաջողցուցին եւ յաջողեցան»:
Կեդրոնական Վարչութեան Ատենապետին Պատգամը
Փակման արարողութեան եզրափակիչ պատգամը ուղղեց ՀՄԸՄ-ի Կեդրոնական վարչութեան ատենապետ Վաչէ Նաճարեան:
Պատգամին սկիզբը Վաչէ Նաճարեան նշեց, որ «փակման այս արարողութիւնը պարզապէս հրաժեշտ չէ, այլ` ՀՄԸՄ-ի աշխարհասփիւռ համակիրներուն համար վկայութիւն է, հաստատում է ՀՄԸՄ-ի հանդէպ ցուցաբերուող ազգային միասնութեան եւ հաւատքին, ՀՄԸՄ-ի աշխատանքներուն հանդէպ մեծ վստահութեան` հայրենիքի, Արցախի թէ սփիւռքի զանազան գաղութներուն մէջ»:
Կեդրոնական վարչութեան ատենապետը այս առիթով շնորհակալութիւն յայտնեց բանակումի խմբապետական կազմին, ՀՄԸՄ-ՀԱՍԿ-ի վարչութեան, բանակումի օժանդակ անձնակազմին, սկաուտական «Արարատեան» կարգի կազմակերպիչ կորիզին եւ բանակումի մասնակից շրջաններու պատուիրակութիւններու պատասխանատուներուն, որոնց բոլորին միասնական եւ հսկայական ճիգերով կարելի եղաւ սկաուտական եւ միութենական այս մեծ իրագործումը կատարել: Վաչէ Նաճարեան չմոռցաւ յիշելու նաեւ ՀՄԸՄ-ի Արցախի սկաուտները, անոնք, որոնք «իրենց գոյատեւումով օրինակ են մեր բոլորին եւ կը շարունակեն արժեւորել պայքարի խորհուրդը եւ ազատ, անկախ ու ամբողջական Հայաստանի մեր յաւերժական տեսլականը»:
Համա-ՀՄԸՄ-ական 12-րդ բանակումին ընդհանուր գնահատումը կատարելով` Կեդրոնական վարչութեան ատենապետը յայտնեց, որ «հակառակ բոլոր մարտահրաւէրներուն, երբ կը կանգնինք այստեղ, ՀՄԸՄ կը փաստէ, որ աւելի քան պարզ կազմակերպութիւն մըն է: ՀՄԸՄ ունի 105 տարուան ժառանգութիւն եւ կը շարունակէ զօրանալ անցնող իւրաքանչիւր օրուան ընթացքին: Համա-ՀՄԸՄական 12-րդ բանակումը վկայութիւնն է ապագայ հայ տիպար քաղաքացիներ պատրաստելու, յաջող ղեկավարներ դաստիարակելու, տարբեր գաղութներու միջեւ կամուրջներ կառուցելու եւ սփիւռքը հայրենիքին կապելու ու մանաւանդ` հայկական իրականութեան մէջ հպարտութեան զգացում սերմանելու աշխատանքին»:
Շարունակելով, Վաչէ Նաճարեան նշեց. «Թող այս բանակումը ծառայէ իբրեւ փարոս` լուսաւորելու գալիք սերունդներու ճանապարհը: Երբ վերադառնաք ձեր երկիրները, ձեզի հետ տարէք այստեղ ձեռք բերած փորձառութիւնները, բարեկամութիւնները եւ սորված միութենական արժէքները: Ձեր դերը` իբրեւ մասնակից այս բանակումին, կ՛երթայ այս բանակավայրի սահմաններէն անդին: Եղէք մեր ազգի պատմութեան յաջորդ էջին դրական փոփոխութիւններուն կորիզը` միշտ օգնելով ուրիշին, բարձրանալով եւ բարձրացնելով: Ձեր դաստիարկութենէն մեկնած` օրինակ եղէք, ձեր քաջութեամբ, նուիրուածութեամբ եւ յարատեւող ոգիով: Աշխարհը թող ականատեսը ըլլայ ՀՄԸՄ-ը բնորոշող միասնութեան ուժին, որովհետեւ միասնաբար, իբրեւ կամաւոր բանակ, կրնանք յաղթահարել ամէն խոչընդոտ եւ այդ ուժը դնենք ի սպաս մեր ազգի յարատեւութեան, որպէսզի ան յաղթական դուրս գայ իրեն սպառնացող բոլոր մարտահրաւէրներէն»:
Հուսկ, Կեդրոնական վարչութեան ատենապետը իր պատգամը եզրափակեց ըսելով. «Թող ՀՄԸՄ-ի բոցը յաւիտեան վառ այրի ձեր սրտերուն մէջ: Վարձքը կատար բոլորին եւ մեր ժամադրութիւնը չորս տարի ետք է` ՀՄԸՄ-ի երկրորդ հարիւրամեակի երկրորդ բանակումին»:
Պաշտօնական Փակումը Եւ Եզրափակիչ Համերգը
ՀՄԸՄ-ի Կեդրոնական վարչութեան ատենապետին պատգամէն ետք, երեկոյեան ժամը 7:30-ին, բանակումին եւ ՀՄԸՄ-ի քայլերգներով վար առնուեցան բանակավայրին մէջ ինը օր ծածանած դրօշակները: Ըստ ընդունուած կարգի, երկիրներու դրօշակները յանձնուեցան բանակումի հերթապահ Արամ Գայսէրեանին, իսկ բանակումին դրօշակը` բանակումի ընդհանուր խմբապետ Պօղոս Մահպուպեանին:
Փակման պաշտօնական արարողութեան յաջորդեց ազգագրական-տոհմիկ երգերու համերգ` կատարողութամբ երգիչ Ներսիկ Իսպիրեանի: Համերգը աւարտեցաւ ազգային-յեղափոխական երգերով եւ հայութեան «խրոխտ, խիզախ եւ միշտ պատրաստ» կամաւոր բանակը մնալու յանձնառութեամբ:
