23.09c
Երեվան
երք, հնս 24
Ֆրանսայի Ծերակոյտին մէջ Ատրպէյճանի դէմ պատժամիջոցներ կիրառելու բանաձեւի շուրջ ընթացող լսումներու ժամանակ բանաձեւի նախագիծի հեղինակ ծերակուտական Պրիւնո Ռեթայոն իր ելոյթը սկսած է Անատոլ Ֆրանսի մէջբերումով. «Ինչ-որ տեղ Արեւելքի մէջ մեր քոյրը կը մահանայ»: Ֆրանսացի գրողի այս խօսքերն ըսուած են 1916 թուականին Օսմանեան կայսրութեան մէջ Հայոց ցեղասպանութեան ժամանակ։
Այս մասին յայտնած է 1lurer.am-ը:
Ռեթայոն այնուհետեւ յիշեցուցած է, որ 2023 թուականի սեպտեմբերին Լեռնային Ղարաբաղի ողջ հայ բնակչութիւնը ընդամէնը երեք օրուան մէջ լքած է հայրենի հողը։
«Հայկական հարցը ֆրանսական հարց է»,-ըսած է ծերակուտականը՝ ընդգծելով, որ բանաձեւի նախագիծը միջկուսակցական է, եւ այն կը խօսի Ֆրանսայի միասնական դիրքորոշման մասին։
Սուտն ու բռնակալութիւնը կ՚ընթանան ձեռք ձեռքի տուած, ըսած է Պրիւնո Ռեթայոն՝ խօսելով Ալիեւի ռեժիմի մասին։
«Պաքուի դիրքորոշումը ցեղասպանութեան ժխտումն է, ծաւալապաշտութիւնը: Ալիեւն անընդհատ կ՚ըսէ, որ Երեւանը հայերու կողմէ գողացուած ատրպէյճանական քաղաք է»,- յայտարարած է Ռեթայոն։
Ան յիշեցուցած է Էրտողանի եւ Ալիեւի պահանջը՝ իրենց առաջ բանալ այսպէս կոչուած «Զանգեզուրի միջանցք»ը, որ Հայաստանի ինքնիշխանութեան խախտում է։
Ռեթայոն ԵՈՒՆԵՍՔՕ-ին կոչ ըրած է շտապ առաքելութիւն ուղարկելու Լեռնային Ղարաբաղ՝ գնահատելու հայկական մշակութային ժառանգութեան վիճակը։
