-2.91c
Երեվան
կրկ, դկտ 22
19 Նոյեմբերին, Գերմանիոյ արտաքին գործոց նախարար Անալենա Պերպոք Երեւան կատարած իր այցելութեան ծիրին մէջ, Հայաստանի արտաքին գործոց նախարարութեան մէջ հանդիպում ունեցաւ Հայաստանի արտաքին գործոց նախարար Արարատ Միրզոյեանի հետ:
Անոնք քննարկեցին երկու երկիրներուն միջեւ գործընկերութեան հետագայ ընդլայնման կարելիութիւնները եւ այդ ուղղութեամբ իրականացուող շարունակական քայլերը, որոնք հիմնուած պիտի ըլլան ժողովրդավարական արժէքներու եւ երկկողմ համագործակցութեան խորացման փոխադարձ հետաքրքրութեան վրայ: Ընդգծուեցաւ ներկայի զարգացումներու պայմաններուն մէջ առաւել սերտ գործակցութեան եւ արդիական ոլորտներուն մէջ համագործակցութեան կարեւորութիւնը:
Միրզոյեան եւ Պերպոք հանգամանալից կերպով քննարկեցին Հայաստան-Եւրոպական Միութիւն գործընկերութեան օրակարգի հարցերու լայն շրջանակ մը` անդրադառնալով վերջին ժամանակահատուածին արձանագրուած ձեռքբերումներուն, ընթացիկ ծրագիրներուն, ինչպէս նաեւ համագործակցութեան խորացման հեռանկարներուն:
Միրզոյեան ընդգծեց, որ Հայաստան-Եւրոպական Միութիւն գործընկերութեան նոր օրակարգը բաւական յաւակնոտ է եւ հիմնուած է թէ՛ գործակցութեան փորձառութեան եւ թէ հետագայ զարգացման տեսլականին վրայ:
Անդրադարձ կատարուեցաւ բազմակողմանի հարթակներու վրայ համագործակցութեան:
Միրզոյեան եւ Պերպոք միտքեր փոխանակեցին նաեւ տարածաշրջանային հարցերու շուրջ: Հարաւային Կովկասի կայունութեան ապահովման ծիրին մէջ անդրադարձ կատարուեցաւ Հայաստանի եւ Ատրպէյճանի միջեւ յարաբերութիւններու կարգաւորման գործընթացին: Միրզոյեան ներկայացուց այս գծով վերջին զարգացումները, նաեւ՝ Հայաստան-Ատրպէյճան խաղաղութեան պայմանագիրի նախագիծի վերջնականացման ուղղութեամբ իրականացուած աշխատանքները` ընդգծելով պայմանագիրի ստորագրութեան կարեւորութիւնը:
Միրզոյեան շեշտեց Հայաստանի կառուցողական մօտեցումը տարածաշրջանային հաղորդակցութիւններու ապաշրջափակման հարցին մէջ՝ իբրեւ խաղաղութեան օրակարգի, ինչպէս նաեւ աւելի լայն աշխարհագրութեամբ տնտեսական կապակցուածութեան խթանման կարեւոր բաղադրիչ:
