1.09c
Երեվան
կրկ, մրտ 01
ՀՀ Արտաքին գործոց նախարարութիւնը յայտարարութիւն տարածած է Մայիս 28-ին Ատրպէյճանի զինուած ուժերուն կողմէ հրադադարի խախտման վերաբերեալ:
Յայտարարութիւնը` ստորեւ․
«Խստօրէն դատապարտում ենք Մայիսի 28-ին ՀՀ սահմանագօտու յարավարեւելեան ուղղութեամբ Ատրպէյճանի զինուած ուժերի կողմից հրադադարի ռեժիմի կոպիտ խախտումը, որի հետեւանքով զոհուել է ՀՀ ԶՈՒ զինծառայող, շարքային Դաւիթ Վահանի Վարդանեանը: Խորին ցաւակցութիւն ու զօրակցութիւն ենք յայտնում զոհուած զինծառայողի ընտանիքի անդամներին ու հարազատներին:
Յատկանշական է, որ այս սադրանքին նախորդել էին Ատրպէյճանի նախագահի` մայիսի 27-ի ապակառուցողական, ռազմատենչ ու առաւելապաշտական յայտարարութիւնները, որոնք ներառում էին նաեւ նկրտումներ ՀՀ ինքնիշխան տարածքի նկատմամբ:
Այս առումով ցանկանում ենք յիշեցնել, որ Ատրպէյճանի ԶՈՒ ստորաբաժանումները 2021թ. Մայիսից Սոթք-խոզնավար հատուածում ապօրինի կերպով ներխուժել են Հայաստանի Հանրապետութեան ինքնիշխան տարածք եւ բռնագրաւել աւելի քան 45 քառակուսի քիլոմեթր տարածք:
Մայիսի 28-ին եւ նախկինում տեղի ունեցած նմանօրինակ սադրանքներն ու միջադէպերը, հրադադարի ռեժիմի պարբերական խախտումները հերթական անգամ հիմնաւորում են Հայաստան-Ատրպէյճան սահմանագծից զօրքերի հայելային հետքաշման եւ սահմանագօտում դիտորդական առաքելութիւն տեղակայելու անհրաժեշտութիւնը, ինչի մասին հայկական կողմը բազմիցս բարձրաձայնել է:
Հաշուի առնելով նաեւ, որ Հայաստանի ու Ատրպէյճանի միջեւ սահմանազատման եւ սահմանային անվտանգութեան հարցերով յանձնաժողովն արդէն սկսել է իր աշխատանքները, այս միջադէպը պէտք է համապատասխան հետաքննութեան ու գնահատականի արժանանայ յանձնաժողովի կողմից:
Միաժամանակ, յիշեցնում ենք, որ 2020թ․ Նոյեմբերի 9-ի յայտարարութեամբ հաստատուած հրադադարի ռեժիմի նախորդ կոպիտ խախտման հետեւանքները, որի արդիւնքում Ատրպէյճանի ԶՈՒ ներխուժել էին Ռուսաստանի Դաշնութեան խաղաղապահ զօրակազմի պատասխանատուութեան գօտում գտնուող Լեռնային Ղարաբաղի Փառուխ գիւղ, մինչ այժմ վերացուած չեն:
Կարեւոր ենք համարում, որ ԵԱՀԿ Մինսքի խմբի համանախագահող երկրները, ՀԱՊԿ-ն, Եւրոպական միութիւնը եւ ողջ միջազգային հանրութիւնը պատշաճ ու հասցէական գնահատական տան Ատրպէյճանի սադրիչ գործողութիւններին ու յայտարարութիւններին, յարձակողական հռետորաբանութեանը, որոնք Հարաւային Կովկասում խաղաղութեան հասնելու ջանքերը խաթարելու նպատակ ունեն:
Ատրպէյճանի ղեկավարութեանը կոչ ենք անում զերծ մնալ սադրիչ գործողութիւններից եւ հռետորաբանութիւնից, կատարել եռակողմ յայտարարութիւններով եւ պրիւսէլեան հանդիպումների արդիւնքներով ստանձնած` տարածաշրջանում կայունութեան ու անվտանգութեան հաստատման յանձնառութիւնները»:
