15.83c
Երեվան
կրկ, ապր 19
Երեւանի աւագանին որոշած է «Երեւանի հ.87 միջնակարգ դպրոց» պետական ոչ առեւտրային կազմակերպութիւնն անուանակոչել ամերիկահայ բարերարներ Յակոբ եւ Լութովիքա Այնթէպլեաններու անուամբ:
Նախագիծի հիմնաւորման մէջ նշուած էր, որ Ամերիկայի Միացեալ Նահանգներու քաղաքացիներ Յակոբ եւ Լութովիքա Այնթէպլեանները փափաք յայտնած են իրականացնելու «Երեւանի հ.87 միջնակարգ դպրոց» ՊՈԱԿ-ի հիմնանորոգումը (Աւան վարչական շրջանի Խուդիակովի փողոց, 44):
Ամուսինները որպէս նուիրաբերութիւն փոխանցած են 500,000 (հինգ հարիւր հազար) ԱՄՆ տոլար գումար: Միաժամանակ, նուիրաբերողները ցանկութիւն յայտնած են դպրոցը անուանակոչելու իրենց անուամբ:
Յակոբ Այնթէպլեանը բժիշկ-սրտաբան է, բժշկական գիտութիւններու դոկտոր, փրոֆեսոր, անդամ է Նիւ Եորքի գիտութիւններու ակադեմիային: «Հայաստանի օժանդակութեան Ամերիկայի համագաղութային մարմնի» կողմէ, որու փոխատենապետը եւ բժշկական օգնութեան յանձնախումբի նախագահն է Յակոբ Այնթէպլեանը, 1988 թուականի 7 դեկտեմբերի երկրաշարժէն ետք զգալի աջակցութիւն տրամադրած է երկրաշարժէն տուժածներուն:
Յակոբ եւ Լութովիքա Այնթէպլեանները աշխոյժօրէն կը մասնակցին եւ կ'օժանդակեն ամերիկահայ համայնքի հասարակական ու մշակութային կեանքին: Երեւան քաղաքի Աւան վարչական շրջանի «Երեւանի հ.87 միջնակարգ դպրոց» պետական ոչ առեւտրային կազմակերպութիւնը Յակոբ եւ Լութովիքա Այնթէպլեաններու անուամբ անուանակոչելու վերաբերեալ ներկայացուած է միջնորդութիւն դպրոցի տնօրինութեան կողմէ:
«Երեւանի հ.87 միջնակարգ դպրոց» ՊՈԱԿ-ի մանկավարժական խորհուրդը դրական գնահատած է Յակոբ եւ Լութովիքա Այնթէպլեաններու անուամբ դպրոցի անուանակոչութեան առաջարկը։
Փոխքաղաքապետ Գայիանէ Մելքոմ-Մելքոնեան նշած է, որ Յակոբ եւ Լութովիքա Այնթէպլեանները արդէն այդ դպրոցի բարեկամներն են, անոնք մի քանի անգամ օգնած են դպրոցին՝ ընելով գոյքի նուիրաբերութիւն եւ այլն: Ան նաեւ նշած է, որ ամուսինները դպրոցի հետ ընդհանուր ծրագիր ունին, որ հետագային եւս համագործակցութիւն պիտի ըլլայ, ներդրումները շարունակական պիտի ըլլան, կը նախատեսուի դպրոցին մէջ արեւմտահայերէնի ուսուցում:
Երեւանի աւագանին որոշեց «Երեւանի հ.87 միջնակարգ դպրոց»-ն անուանակոչել «Երեւանի Յակոբ եւ Լութովիքա Այնթէպլեաններու անուան հ.87 միջնակարգ դպրոց» պետական ոչ առեւտրային կազմակերպութիւն:
