19.64c
Երեվան
ուրբ, հլս 24
Պաշտօնավարման մէկ տարին ամփոփելու նպատակով ՀՀ վարչապետ Նիկոլ Փաշինեանի հրաւիրած մամուլի ասուլիսը տեւած է հինգուկէս ժամ` այդպիսով գերազանցելով նախորդ 4 ասուլիսները իր տեւողութեամբ:
Փաշինեանը 8 Մայիսին հրաւիրած ասուլիսի սկիզբը ներկայացուցած է 100 փաստ Նոր Հայաստանի մասին, այնուհետեւ պատասխանած է 60-է աւելի հարցերու:
Ասուլիսի ընթացքին վարչապետին տրուած հարցերը կը վերաբերէին Հայաստանի ներքին եւ արտաքին քաղաքականութեան տարբեր ուղղութիւններուն, երկրին մէջ ընթացող դատաիրաւական գործընթացներուն, Լեռնային Ղարաբաղի հակամարտութեան խաղաղ կարգաւորման բանակցային գործընթացին, սահմանային լարուածութեան եւ շարք մը այլ թեմաներու:
Նիկոլ Փաշինեանը ստիպուած եղած է 10:30-ին սկսած մամուլի ասուլիսը ընդհատել միայն 16:00-ին, երբ նշած է, որ պէտք է ուղեւորուի Ազգային ժողով` մասնակցելու կառավարութեան հետ հարցուպատասխանին:
Վարչապետը նշած է, որ մամուլի ասուլիսը դադրեցնելու ցանկութիւն չունի, սակայն ստիպուած է:
«Սա էլ իմ երազանքի ասուլիսը չստացուեց, քանի որ պէտք է Ազգային ժողովում մասնակցեմ հարցուպատասխանին: Իմ երազանքների ասուլիսն այն է, որ վերջին լրագրողն այստեղից դուրս գայ, գնայ, էլ մարդ չլինի, ես ամենավերջինը գնամ»,- ըսած է Փաշինեանը:
Վարչապետը նշած է, որ յաջորդ մամուլի ասուլիսները մարզերուն մէջ իրականացնելու մտադրութիւն ունի, եւ հնարաւոր է, որ առաջինը կ'այանայ Շիրակի մարզին մէջ:
