21.99c
Երեվան
հնգ, հլս 23
ՀՀ գլխաւոր դատախազութիւնը վերաքննիչ բողոք պիտի ներկայացնէ Ազգային Ժողովի պատգամաւոր, ԵԿՄ նախկին նախագահ Մանուէլ Գրիգորեանը գրաւի դիմաց կալանքէն ազատ արձակելու վերաբերեալ առաջին ատեանի դատարանի որոշման դէմ։ «Արմէնբրես»-ի հետ զրոյցի ժամանակ այս մասին ըսած է ՀՀ գլխաւոր դատախազութեան հանրային կապերու բաժնի պետ Արեւիկ Խաչատրեանը։
«Գլխաւոր դատախազութիւնը ստացել է դատարանի որոշումը, այն հիմնաւոր չէ, եւ Դատախազութիւնը վերաքննիչ բողոք է ներկայացնելու դատարանի որոշման դէմ»,-ըսած է Արեւիկ Խաչատրեանը։
Մանուէլ Գրիգորեանին մեղադրանք առաջադրուած է Քրէական օրէնսգիրքի 235-րդ յօդուածի 2-րդ մասով՝ ապօրինի կերպով ռազմամթերք ձեռք բերելու եւ այլ անձանց հետ նախնական համաձայնութեամբ պահելու համար, ինչպէս նաեւ քրէական օրէնսգիրքի 179-րդ յօդուածի 3-րդ մասի 1-ին կէտով՝ խումբ մը անձանց հետ նախնական համաձայնութեամբ իւրացման եղանակով իր վստահութեան յանձնուած առանձնապէս խոշոր չափերով ուրիշի գոյք հափշտակելու համար: 16 Յունիսին Մանուէլ Գրիգորեանը ձերբակալուած է, ապա՝ 19 յունիսին, Ազգային ժողովի պատգամաւորներու քուէարկութեամբ, զրկուած է պատգամաւորական անձեռնմխելիութենէ ու դատարանի որոշմամբ կալանաւորուած: Կալանքի տակ գտնուելու ընթացքին պատգամաւորի պաշտպանները բազմիցս բարձրաձայնած են անոր առողջական խնդիրներու մասին՝ նշելով, որ իրենց պաշտպանեալի կեանքին վտանգ կը սպառնայ:
