-9.91c
Երեվան
կրկ, փտր 23
Հայաստան- Անցեալ շաբաթ լրատուամիջոցներու մէջ լուր տարածուած էր, թէ սուրիահայ գրող, բժիշկ, հասարակական գործիչ Թորոս Թորանեան բնակութիւն հաստատած է Հայաստան եւ նիւթական ծանր կացութեան մատնուած է: Ան, ինչպէս նշած էր կայքերէն մէկը, չունի եկամուտի աղբիւր, կը բնակի վարձով եւ մտահոգութիւն յայտնուած էր, թէ արդեօ՞ք պետական միջոցներէ կը գտնուին աղբիւրներ` սատարելու ականաւոր մտաւորականը, որու նմանը, ինչպէս նշած էր լրատուամիջոցը, Սփիւռքի մէջ չունինք: Իրաւ, Թորոս Թորանեան այսօր սփիւռքի երէց սերունդի ամէնէն ականաւոր մտաւորական գրողն է, աւելի քան 150 գիրքերու, բազմաթիւ դասախօսութիւններու, մենագրութիւններու հեղինակ: Ան Հայաստանի հանրապետութեան «Մովսես Խորենացի» մետալակիր է:
Այսօր «Արեւելք» Երեւանի մէջ հանդիպեցաւ Թորոս Թորանեանին: Նախ, ըսենք, որ մտաւորականին տրամադրութիւնը շատ բարձր էր: Ան իրեն բնորոշ կենսախնդութեամբ տեղեկացուց, որ իր մնացած կեանքը պիտի ապրի Հայաստանի մէջ` բազմաթիւ սփիւռքահայերու երազած հայրենիքը:
Մեր հարցումին ի պատասխան, թէ ի՞նչ խնդիրներ ունի, ականաւոր մտաւորականը պատասխանեց. «Հրաշալի կը զգամ. ոչ մէկ խնդիր ունիմ»: Թորոս Թորանեան շնորհակալութիւն յայտնեց իրմով մտահոգ բոլորին, մանաւանդ լրատուամիջոցներուն, բայց նշեց, որ ինք ոչ մէկ հարցով երբէք ոչ ոքի դիմած է, իր խնդիրներու մասին ոչ մէկու հետ զրուցած է եւ կարիք չ'ըզգար օտար մարդոցմէ օգնութիւններու «Ես մուրացիկ չեմ: Փառք Աստծոյ, լաւ եմ, շրջապատուած եմ հարազատներով, բարեկամներով, ընկերներով, ընտանիքի անդամներով, որոնք չափազանց հոգատար են իմ հանդէպ»,-«Արեւելք»-ին յայտնեց Թորոս Թորանեան: Գրողը նաեւ ըսաւ, որ սկսած է գրել եւ շուտով յօդուածաշար կը տպագրէ «Ազգ»-ի եւ «Գրական թերթ»-ի մէջ: Իր գրութիւններուն մէջ, ինչպէս նշեց Թորոս Թորանեան, ներառած է նաեւ հայաստանեան պատկերներ բակային զրոյցներ: *Թորոս Թորանեանի լուսանկարը ՝ «Արեւելք»ի:
