image
Հրատապ լուրեր:

Սորոսը եւ ... Սփիւռքահայը

Սորոսը եւ ... Սփիւռքահայը

 Հայաստանի   զարգացումներուն  հետեւող  սփիւռքահայը անձկութեամբ կը սպասէ, որ    մեր երկրին մէջ   դրական նոր        հունի մը մէջ մտնէ, ու ինք  պատռէ -նետէ իր գրպանը եղած  բոլոր անձագիրները ու   ետին թողնելով ամէն ինչ՝    ի վերջոյ վերադառնայ  եւ հաստատուի Հայաստանի  մէջ։ 
     Ի դէպ,  սփիւռքահայութեան շրջանակներուն համար, կամ առնուազն անոնց համար, որոնց  հոգիներուն ու մտքերուն  մէջ  իր լայն  տեղն ունի մեր  երկիր Հայաստանը, բնաւ   հետաքրքրական  չէ,  թէ ո՛վ է օրուան Հայաստանի  իշխանութիւնը։   Ու  լաւ է նաեւ, որ սփիւռքահայը    թուք  ու մուր չունի     ո՛չ երէկուան, ո՛չ   այսօրուան, ոչ ալ       մաղձ  պիտի ունենայ  Հայաստանի վաղուան  իշխանութիւններուն հանդէպ։ 
 Սփիւռքահայը  մէկ «տարտ»  ունի.     անոր  սրտի ցաւը  Հայաստանի     բարւոք  ըլլալն   է, զարգացած ու ապահով երկիր  ըլլալն է,      «նորմալ»  երկիր ըլլալն է, լաւ կրթական եւ  արդար   դատական  համակարգ  ունեցող երկիրն  ըլլալն է։ 

 Ասոնք են  ազնիւ  սփիւռքահայերու մօտեցումները  այսօր,  ու զինք բնաւ  չի հետաքրքեր,  թէ  քաղաքական ինչպիսի՛     «էնթրիկներ»  կը լարուին,   կամ, առհասարակ,   բարեկարգութեան   եւ բարեփոխման    խորագիրին տակ ինչպիսի՛   օրակարգեր   առաջ  կը քաշուին։ 
 Ու այս բոլորէն  անդին,   սփիւռքահայը  շատ լաւ գիտէ, որ   Հայաստանի   ներքին լարուածութիւնները,  կամ  աւելի կոպիտ ասած՝   ներքին  ճահիճները ոչ մէկ կերպ  պիտի օգնեն  մեզի, որպէսզի սայլը տեղէն  շարժենք  ու  առաջ  տանինք     տնտեսական  եւ ընկերային բազմապիսի խնդիրներու առաջ կանգնած   այսօրուան   Հայաստանը։ 
 Գիտէք՝  վերջին մէկ տարուան   ընթացքին  Հայաստանի մէջ  օրակարգ դարձաւ  ամերիկացի   յայտնի  գործիչ   Ճորճ  Սորոսի   անունը։  Մեծով – պզտիկով,    համախոհներով  եւ  ընդդիմախօսներով  բոլորը  խօսեցան Ճորճ Սորոսի մասին՝  յաճախ  համը  հանելով,   յաճախ  անտեղի   եւ նոյնիսկ երեւակայան    վերագրումներ   կատարելով,   յաճախ  մեր   երկիրը  միջազգային դաւադրութիւններու ենթադրեալ   օճախ  կամ խաղադաշտ  համարելով ու յաճախ ալ   դուրսէն եկած   տագնապի   կամ    արժէքային  գրոհներու  ահէն    վախնալով։  Այդ  բոլորը յարգելի  են:    Ոմանք կառչած են մեր ազգային   արժէքներուն, սակայն   կը մոռնան, որ այդ  արժէքները   առաջ  տանելու  թիւ մէկ դեղատոմսը  «հայաթ»-ը  նստիլն ու        երէկուան կամ  այսօրուան  իշխանութիւնները   հայհոյելը  չէ։ 
 «Ճորճ  Սորոսը  ծրագիրներ մշակած է»,  կ՚ըսեն շատերը։   Ես անոնց կը պատասխանեմ. «Դուք ալ  ծրագիրներ մշակեցէք, այդ ծրագիրներուն մէջ  ազգային  աւանդոյթի   աղն ու թթխմորը  դրէք եւ   յանուն Հայաստանի վերելքին գործի  անցէք»։  Բայց  որո՞ւ կ՚ըսեմ ...  Հակասորոսականութիւնը սքանչելի դրուածք  կ՚ըլլայ, եթէ  զայն քննադատողները  «մէյտան»   իջնելու   փոխարէն՝    մոմ մը վառեն,      արտ մը ցանեն,     տուն մը կառուցեն   եւ  պատանի   աշակերտ մը   «հայաթ»-էն  տուն բերեն, որպէսզի  ան ալ իր դասերուն  ետեւէն իյնայ։  Այլապէս  այսպէս, երբ  յումպէտս կը կրակենք  եւ օդային       փուչիկներ կը պայթեցնենք,    Սորոսն  աւելի կը զօրանայ,  ու անոր  յստակ եւ ընդգծուած ծրագիրները  ամէն տեղ, ամէն    դաշտի ու գետինի  վրայ նոր ծաղիկներ պիտի  աճեցնեն... 
 Այս բոլորը նշելէ   ետք  հարկ է նաեւ մտածել, որ   այսօրուան  սփիւռքահայը  ինք   պէտք է  ըլլայ մեր  իրական  Սորոսը։  Ան,  որ  ամերիկաները  չափած-ձեւած է  եւ գիտէ  այս   երկրի արժէքը ու ան, որ  կը հաւատայ  մեր երկրի յաւիտենութեան ու անմահութեան։  Ան, որ կախեալ չէր ոչ  երէկուան  իշխանաւորներէն, ոչ ալ  այսօր պատրաստ է  քծնելու կամ սէլֆիներ   ընելու   այսօրուան  իշխանութիւններուն հետ։  Ան, որ ըսելիք ունի,  ան,  որ  ճիշդին ճիշդ  կ՚ըսէ ու չի  սրտնեղիր ու ան,  որ   եղած  սխալին    դիմաց կը  կանգնի պահ մը ու կ՚ըսէ. «Հէ՜յ, պարոնայք, ձեր ըրածը   լրիւ  սխալ է...»: Ան,  որ կը սիրէ մեր երկիրը  ու  Հայաստանը կը համարէ ոչ թէ մեռնելու ու թաղուելու գերեզմանահող:   Ան, որ   իր թեւերը կը բանայ Արարատին դիմաց  ու   նորէն կը խօսի հին ուխտին անունով ու այդ հզօր լերան կ՚ըսէ. «Տե՛ս  ես իմ ուխտը  կատարեցի,   ամէն ինչ ետեւս թողեցի  ու եկայ  քեզ գրկելու ...»:  Այնպէս որ,   չ’արժեր  այդքան խօսիլ,  չ’արժեր  այդքան   արժէք  տալ, չ’արժեր  այդքան  վախնալ   Ճորճ Սորոսէն ու սորոսիկներէն, այնքան   ատեն, որ   իրական  հայու կերպարները՝ մեզի հետ եւ մեր շուրջը  ապրող,   շատ  են ու անոնք պատրաստ են ամէն բան տալու մեր երկրին... 
 Սագօ Արեան 

Սագօ Արեան

Սագօ Արեան

Ծնած է Պէյրութի Պուրճ Համուտ թաղամասը՝ 1972-ի...