4.09c
Երեվան
երք, մրտ 11
Ամերիկեան գրականութեան մեծատաղանդ գրող Ուիլիամ Սարոյեանի տունը գնած «Renaissance Foundation» հիմնադրամը յայտարարած է, որ առանձնատունը պիտի վերակառուցուի որպէս տուն-թանգարան եւ պիտի հանդիսանայ մշակութային օճախ ոչ միայն հայութեան, այլեւ ամբողջ աշխարհի համար: Տուն–թանգարանէն ներս պիտի կազմակերպուին գրական երեկոներ, փառատօններ եւ այլ մշակութային միջոցառումներ: Ինչպէս կը նշուի հիմնադրամի տարածած հաղորդագրութեան մէջ Սարոյեանի տունը կը գտնուէր ամայացած ու դատարկ եւ վերանորոգութեան լուրջ պահանջք ունեցող վիճակի մէջ, երկար տարիներ խնամքէ զրկուած ըլլալուն պատճառով: Արթուր Ճանիբէկեանի կողմէ հիմնադրուած «Renaissance Foundation» հիմնադրամը գիտակցելով Սարոյեանի ժառանգութեան համամարդկային կարեւորութիւնը, նկատի ունենալով առանձնատան անմխիթար վիճակը եւ նպատակ ունենալով զայն փրկել ոչնչացումէն՝ 2015 թուականին գնած էր զայն: «Renaissance Foundation» հիմնադրամը շուտով պիտի մշակէ եւ հանրութեան դատին յանձնէ տուն-թանգարանի վերակառուցման նախագիծն ու գործունէութեան փլանը: Հիմնադիր կողմը հանրութեան տարածած հաղորդագրութեան մէջ նշած է, որ մեծ ուրախութեամբ կ'ընդունին առաջարկներ եւ բոլոր փափաքողները իրենց գաղափարները կրնան ներկայացնել ՝ ուղարկեով info@saroyanmuseum.com էլեկտրոնային հասցէին:
Նշենք, որ 20-րդ դարու ամերիկեան գրականութեան հսկաներէն մէկը՝ Ուիլիամ Սարոյեան վախճանած է 18 մայիս 1981-ին, իր ծննդավայր Ֆրեզնոյի մէջ։ Հայ մեծ գրողի աճիւնին մէկ մասը թաղուած է Երեւանի Կոմիտասի անուան զբօսայգիի պանթէոնը:
