-4.91c
Երեվան
կրկ, դկտ 28
Յաջորդ շաբաթ Գերմանիան Պէյրութի նաւահանգիստը վերականգնելու բազմամիլիառանոց նախագիծ պիտի ներկայացնէ Լիբանանի իշխանութիւններուն, որպէսզի երկրի քաղաքական գործիչները խրախուսէ ձեւաւորելու կառավարութիւն, որ կրնայ կանխել նիւթական փլուզումը, կը հաղորդէ Reuters-ը: Պերլինը 7 ապրիլին առաջարկ պիտի ներկայացնէ այն մասին, որ Եւրոպական ներդրումային դրամատունը համաձայնած է օգնել տարածքի մաքրման եւ վերանորոգման ֆինանսաւորման հարցով: Աղբիւրներէն մէկը պերլինեան նախագիծի ֆինանսաւորումը 2-3 միլիառ եւրօ գնահատած է:
Դիւանագիտական աղբիւրները նշած են, որ լիբանանեան քաղաքական վերնախաւը նախ պէտք է համաձայնութեան գայ նոր կառավարութեան կազմի շուրջ, որպէսզի պետական ֆինանսները շտկէ եւ քորուփցիան (փտածութիւնը) արմատախիլ ընէ: Այդ պայման է, որ ներդրողները, ներառեալ Արժոյթի միջազգային հիմնադրամը, կը պնդեն՝ նախքան միլիառաւոր տոլարներու օգնութիւնը բանալը: «Այս ծրագիրը առանց պարտաւորութիւններու չըլլար»,- ըսած է աղբիւրներէն մէկը: Նաւահանգիստի աղէտէն ութ ամիս անց շատ լիբանանցիներ, որոնք կորսնցուցած են իրենց ընտանիքը, տուներն ու ձեռնարկութիւնները, դեռ կը սպասեն պայթումի հետաքննութեան արդիւնքներուն: Լիբանանը փլուզման եզրին է՝ գնորդները կը վիճին ապրանքներու շուրջ, ցուցարարները կը փակեն ճանապարհները, կը փակուին ձեռնարկութիւնները: Արտասահմանեան նուիրատուները յայտարարած են, որ նոր կառավարութիւնը պէտք է հաստատուն մանտաթ ունենայ տնտեսական բարեփոխումներ իրականացնելու համար, ներառեալ կեդրոնական դրամատան հաշուետուութիւնը:
Նաւահանգիստէն բացի, Գերմանիոյ առաջարկը կը նախատեսէ վերակառուցել յարակից աւելի քան 100 հա տարածք, որ, ըստ երկու դիւանագիտական աղբիւրներու, համահունչ պիտի ըլլայ Պէյրութի կեդրոնի վերակառուցման: Աղբիւրները նախագիծի արժէքը կը գնահատեն 5-15 միլիառ տոլար եւ կ'ըսեն, որ այն կրնայ մինչեւ 50 000 աշխատատեղ ստեղծել: Լիբանանի պաշտօնական ներկայացուցիչը տեղեկացուցած է, որ Ֆրանսան եւ Ֆրանսայի նաւահանգիստները ու բեռնարկող (container) բեռնափոխադրումներ իրականացնող CMA CGM ընկերութիւնը նոյնպէս հետաքրքրուած են վերանորոգման նախագիծով:
