-3.91c
Երեվան
ուրբ, հնվ 02
«Հերթական անգամ ցաւով ականատեսը եղանք ադրբեջանցիների կողմից Արցախի մեր սրբավայրերից մէկի պղծման որողրմելի դէպքին, երբ դիմակաւոր անձը հեգնական կեցուածքով նստել էր Ստեփանակերտի Սուրբ Աստուածածին առաջնորդանիստ եկեղեցու խորանին տեղադրուած գահի վրայ»: Այս մասին յայտարարութիւն տարածած է Հայ Առաքելական Սուրբ Եկեղեցւոյ Արցախի թեմը՝ անդրադառնալով օրերս համացանցի մէջ յայտնուած լուսանկարին:
«Անկեղծ ասած մեզ համար նորութիւն չէ եւ սպասելի էր նման վերաբերմունք, որովհետեւ նրանք երբեք էլ չեն թաքցրել իրենց ատելութիւնը մեր սրբավայրերի, հոգեւոր-մշակութային կոթողների հանդէպ եւ յարմար առիթի դէպքում յագեցում են տուել իրենց ներսում խնամքով պահուող քոչուոր- թալանչու էութեանը:
Մեզ համար առաւել ցաւալի է այդ ամէնի հանդէպ մեր անզօր վիճակը, երբ բացի խօսքային մակարդակում մեր զայրոյթը պարպելուց, որեւէ այլ տարբերակով չենք կարողանում արձագանգել կամ կանխել նման վանդալիզմի դէպքերը: Այս ամէնը վիրաւորական է մեր Եկեղեցու համար, ամէն մի հայի համար, եւ ի պաշտօնէ հայի արժանապատւութեան երաշխաւորի՝ մեր պետութեան համար:
Յուսով ենք, որ պատկան մարմինների կողմից կարուեն համապատասխան հետեւութիւններ եւ անհրաժեշտ քայլեր՝ Արցախի հին ու նոր սրբավայրերի, մշակութային ժառանգութեան պատշաճ պահպանութեան համար: Եթէ մենք չենք հասկանում մեր իրական արժէքը, ոչ մէկն էլ չի հասկանայ ու չի յարգի մեզ:
Ադրբեջանը շարունակում է իր աւերիչ քաղաքականութիւնը`վանդալիզմի ենթարկելով օկուպացուած Արցախի վանքերը, եկեղեցիները, խաչքարերը, շէնք ու շինութիւնները»,- ըսուած է յայտարարութեան մէջ, որուն կից ներկայացուած են վանտալիզմի դէպքերու մասին փաստող լուսանկարները:
Տապալած են Ստեփանակերտի մերձակայքը`Դաշուշէն գիւղի մօտակայքը գտնուող բլուրներէն մէկու վրայ կանգնեցուած 50 մեթրանոց լուսատու խաչը։
