7.09c
Երեվան
ուրբ, հկտ 18
ՀՀ նախագահ Արմէն Սարգսեանը շնորհաւորական ուղերձ յղած է Աշխատանքի օրուայ առիթով։
Ուղերձը ամբողջութեամբ կը ներկայացնենք ստորեւ.
«Սիրելի հայրենակիցներ,
Այսօր Աշխատանքի օրն է, ինչի առթիւ շնորհաւորում եմ բոլորիդ:
Բոլոր արժէքները եւ արժէքաւոր ամէն ինչ՝ հանապազօրեայ հացից մինչեւ նորագոյն արհեստագիտութիւն, մշակութային արժէքից մինչեւ տնտեսական նուաճում, ստեղծւում են մարդու աշխատանքի շնորհիւ: Պատահական չէ, որ մարդկային քաֆիթալն ամենաթանկն է աշխարհում:
Աշխատանքը մղում է մտածելու, երազելու, ստեղծելու, արարելու: Յարափոփոխ աշխարհում գիտելիքներով եւ հմտութիւններով զինուած աշխատանքն է երաշխաւորուած յաջողութեան գրաւականը: Միաժամանակ, շատ կարեւոր է, որ աշխատանքի իրաւունք ունեցող իւրաքանչիւր ոք աշխատելու հնարաւորութիւն ունենայ, եւ այդ աշխատանքն ապահովի արժանապատիւ կենսամակարդակ: Բարեկեցիկ հասարակութիւնն ապահով երկրի երաշխիքն է:
Աշխարհի ցանկացած երկրում մենք կարող ենք տեսնել մեր հայրենակիցների արարող ձեռքի եւ ստեղծագործ մտքի արգասիքները, բայց մեր մեծագոյն ձեռքբերումների աղբիւրը Հայաստանն է, որտեղ պէտք է շարունակեն կերտուել մեր յետագայ յաջողութիւնները:
Հենց մեր աշխատանքով պէտք է ապահովենք Հայաստանի այսօրուայ ու ապագայ զարգացումը՝ ոչ միայն նորարար մօտեցումներով, այլեւ կիրառելով ժամանակակից աշխատանքի կազմակերպման եւ աշխատողների իրաւունքների պաշտպանութեան առաջադիմական փորձն ու մօտեցումները: Վստահ եմ, որ բոլորիս ջանքերը համատեղելով՝ շէնացնելու ենք մեր միասնական Հայաստանը:
Կրկին շնորհաւորում եմ բոլորիդ: Առանձնայատուկ ուզում եմ շնորհաւորել աշխատանքի վեթերաններին, ովքեր մեզ փոխանցում են ոչ միայն աշխատանքի նկատմամբ պատասխանատւութիւնն ու յարգանքը, այլեւ դարերից մեզ հասած արհեստներն ու հմտութիւնները:
Ցանկանում եմ, որ բոլորդ հնարաւորութիւն ունենաք աշխատանքի միջոցով, աշխատանքի շնորհիւ իրացնելու ձեր ֆիզիքական, մտաւոր, հոգեւոր ու նիւթական հմտութիւնն ու ներուժը, գիտելիքը, փորձն ու երեւակայութիւնը:
Մաղթում եմ, երջանկութիւն, բարեկեցութիւն եւ ամենայն բարիք»:
