26.09c
Երեվան
հնգ, հլս 10
Ապրիլի 7-ին՝ Ս. Աստուածածնի Աւետման տօնին, Մայր Աթոռ Սուրբ Էջմիածնի «Գարեգին Ա» գիտական կենտրոնում, Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի հանդիսապետութեամբ, տեղի ունեցաւ շքանշանի յանձնման հանդիսաւոր արարողութիւն: Մայր Աթոռ Սուրբ Էջմիածնի պայծառութեանը բերած բացառիկ աւանդի ու աստուածահաճոյ ծառայութիւնների համար ՀՀ Բարձրագոյն դատական խորհրդի նախագահ, ի. գ. դ. Գագիկ Յարութիւնեանին շնորհուեց «Ասպետ Սուրբ Էջմիածնի» տիտղոս եւ Հայրապետական շքանշան:
Արարողութիւնը բացուեց Տէրունական աղօթքով, ապա ցերեկոյթի մասնակիցներին ողջունեց Մայր Աթոռի Դիւանատան Ներեկեղեցական յարաբերութիւնների գրասենեակի տնօրէն Արժանապատիւ Տ. Պարոյր քահանայ Աւետիսեանը:
Մեծարեալի կեանքին ու վաստակաշատ գործունէութեանն անդրադարձան Գերագոյն հոգեւոր խորհրդի եւ ՀՀ Բարձրագոյն դատական խորհրդի անդամ ի. գ. դ. Գեւորգ Դանիէլեանը եւ ՀՀ արուեստի վաստակաւոր գործիչ, կոմպոզիտոր Տիգրան Մանսուրեանը:
Այնուհետեւ «Ուրախ լեր» շարականի երգեցողութեան ներքոյ բերուեց Հայրապետական շքանշանը, որից յետոյ Գարեգին Բ Վեհափառ Հայրապետն իր ողջոյնի ու օրհնութեան խօսքն ուղղեց ներկաներին:
«Սուրբ Յարութեան տօնական այս օրերին վերստին Մեր շնորհաւորանքներն ենք բերում ամէնքիդ՝ «Քրիստոս յարեաւ ի մեռելոց» կենսաբեր աւետիսով: Տօնական այս ուրախութեան մէջ այսօր մենք համախմբուել ենք Մայր Աթոռում գնահատելու եւ մեծարելու մեր ժողովրդի արժանաւոր զաւակ, բազմաշնորհ հայորդի տիար Գագիկ Յարութիւնեանին, ում անունը եւ գործունէութիւնը քաջածանօթ են հայ հանրութեանը:
Տիար Գագիկ Յարութիւնեանի գործունէութիւնը աղերսուած է Հայաստանի անկախ պետականութեան վերակերտման պատմութեանը: …Տիար Գագիկ Յարութիւնեանը կանգնեց անկախ պետականութեան վերակերտման նուիրեալների շարքերում: Նա պետական համակարգ եկաւ խորհրդային տարիների կառավարման փորձառութեան ու գիտելեաց հարուստ պաշարով, մեր հայրենիքի լուսաւոր ապագայի կառուցմանը մասնակցութիւն բերելու ազնիւ յանձնառութեամբ: Ազգային ու պետական մտածելակերպով օժտուած՝ նա ստանձնեց բարձր ու պատասխանատու պաշտօններ…: Ծառայական բոլոր հանգամանքներում նրա գործունէութեան մէջ գերակշռող եղաւ երկրին ու ժողովրդին օգտակար լինելու գիտակցութիւնը, հայրենիքի զօրացման ու հայութեան համախմբման տեսիլքը: Այս մղումով նա իր բոլոր յանձնառութիւնների մէջ հետապնդեց պետութեան ու հասարակութեան շահը, ջանաց ներդրում բերել երկիրը ցնցումներից զերծ պահելու գործին, ներքին կեանքի տագնապների ու ալեկոծութիւնների ժամանակ իր հաշտարար բնաւորութեամբ ու համոզիչ փաստարկներով կարողացաւ նպաստել լարուածութեան յաղթահարմանը:
Տիար Գագիկ Յարութիւնեանի վաստակը գնահատարժան է յատկապէս մեր երկրում սահմանադրական արդարադատութեան իրականացման գործում: Կոչուելով ՀՀ նորահաստատ Սահմանադրական դատարանի նախագահի պաշտօնին՝ պարոն Յարութիւնեանը մեծ ու նշանակալի աւանդ բերեց դատական բարձրագոյն իշխանութիւնը ներկայացնող մարմնի կայացմանն ու արդիւնաւոր գործունէութեանը, որն անհրաժեշտ նախապայմաններից է իրաւական պետութեան կերտման համար:
Տիար Գագիկ Յարութիւնեանը իր երկարամեայ գործունէութեան մէջ մշտապէս դրսեւորել է անկեղծ սէր ու նախանձախնդրութիւն հանդէպ մեր ժողովրդի ազգային ու հոգեւոր արժէքները: Տակաւին երջանկայիշատակ Գարեգին Ա Ամենայն հայոց Կաթողիկոսի գահակալութեան շրջանից նա հետեւողականօրէն աջակցել է Եկեղեցի-պետութիւն յարաբերութիւնների կանոնակարգման ու ամրապնդման, օրէնսդրութեան մէջ մեր Եկեղեցու դերի ու առաքելութեան պատշաճ ամրագրման գործին: Այսօր, գոհութիւն Աստուծոյ, Եկեղեցի-պետութիւն ձեւաւորուած յարաբերութիւնները, որում գովելի աւանդ ունի նաեւ տիար Գագիկ Յարութիւնեանը, ամուր հիմք է դարձել մեր Եկեղեցու առաքելութեան արդիւնաւորման եւ մեր հոգեւոր ժառանգութեան անխաթար պահպանման ու նոր սերուդներին փոխանցման համար՝ նպաստելով նաեւ մեր երկրի առաջընթացին ու նոր ձեռքբերումներին:
Մեծայարգ տիար Գագիկ Յարութիւնեան, «Ասպետ Սուրբ Էջմիածնի» շքանշանը Հայրապետական բարձր պարգեւ է արժանաւոր հայորդիներին, ովքեր իրենց գործերով ու յանձնառութիւններով աջակցում են մեր Եկեղեցու տիրաւանդ առաքելութեան արդիւնաւորմանը, ներդրում բերում Սուրբ Էջմիածնի բարեզարդման մէջ, նպաստում մեր ժողովրդի հոգեւոր կեանքի վերազարթօնքին: Դուք անձնուիրաբար ծառայել էք մեր երկրին ու մեր ժողովրդին, աւանդ բերել Առաքելական մեր Սուրբ Եկեղեցու եւ Մայր Աթոռ Սուրբ Էջմիածնի պայծառութեանը: Այսօր գոհունակութիւն է Հայրապետիս համար այս պատուաւոր շքանշանը շնորհել Ձեզ՝ եկեղեցանուէր Ձեր իրագործումների համար:
Վստահ ենք, որ պարգեւը խրախոյս պիտի լինի Ձեզ՝ նորանոր յանձնառութիւններով առաւել հարստացնելու Ձեր բարի ու արժանաւոր գործերի վաստակը ազգային ու հոգեւոր մեր կեանքում», - ասաց Վեհափառ Հայրապետը:
Իր շնորհաւորանքներն ու մաղթանքները փոխանցելով մեծարեալին` Նորին Սրբութիւնը Հայրապետական շքանշանով զարդարեց պետական գործչի կուրծքը:
Պարգեւաբաշխութեան առիթով իր ապրումները ներկաների փոխանցեց տիար Գագիկ Յարութիւնեանը՝ երախտագիտութիւն յայտնելով Հայոց Հայրապետին եւ Մայր Աթոռին բարձր գնահատանքի ու նման վերաբերմունքի համար: Անդրադառնալով Ամենայն Հայոց Կաթողիկոսի եւ նրա երջանկայիշատակ նախորդների հետ իր զրոյցներին, ինչպէս նաեւ Մայր Աթոռի հետ իր մշտական կապին` մեծարեալն իր համոզումն արտայայտեց, որ մարդը առանց հոգեւոր կայուն արժէքների եւ հարստութեան չի կարող որպէս բանական էակ ինքնադրսեւորուել: Տիար Յարութիւնեանը խօսեց նաեւ այն կարեւոր դերակատարութեան մասին, որ Հայոց Եկեղեցին ունեցաւ ինքութեան պահպանման եւ յարատեւման գործում: Վերջինս ընդգծեց նաեւ, որ շնորհուած պարգեւը լրացուցիչ խթան եւ պարտաւորութիւն կը հանդիսանայ` աւելի ժրաջան աշխատելու համար:
Միջոցառմանը երաժշտական կատարումներով հանդէս եկան Հայաստանի «Նոր անուններ» ծրագրի պատանի երաժիշտ-կատարողները (գէղ. Ղեկավար Սիլուայ Մեքինեան):
Հանդիսութիւնը եզրափակուեց Ամենայն Հայոց Կաթողիկոսի «Պահպանիչ» աղօթքով:
