33.25c
Երեվան
չրք, հլս 15
Հայաստանի պաշտպանութեան նախարարի պաշտօնակատար Վիգէն Սարգսեանը շնորհաւորական ուղերձ յղած է Հայրենական մեծ պատերազմի յաղթանակի, Շուշիի ազատագրման եւ պաշտպանութեան բանակի կազմաւորման տարեդարձի առթիւ, միաժամանակ, տեղեկացուցած է, որ «այլ կարգավիճակով» պիտի շարունակէ ծառայել ժողովուրդին։
«Շնորհաւորում եմ բոլորիս Հայրենական մեծ պատերազմում տարած յաղթանակի, Շուշիի ազատագրման փառապանծ տօների եւ պաշտպանութեան բանակի կազմաւորման տարեդարձի առթիւ: Խոնարհում եւ երախտագիտութիւն մեր բոլոր վեթերաններին, յաղթանակների համար թանկ գին վճարած մեր բոլոր հայրենակիցներին: Թող մեզ միշտ առաջնորդի յաղթական ոգին եւ Հայրենիքն ամէն ինչից վեր դասելու քաղաքացիական սկզբունքը: Բայց այսօր ձեզ դիմում եմ այլ առիթով: Քաղաքական իրադարձութիւնների բերումով իմ նախատեսածից շուտ եկաւ բանակի ղեկավարի կարգավիճակում ձեզ հրաժեշտ տալու պահը»,- գրած է Վիգէն Սարգսեանը։
«Նախարարը քաղաքական պաշտօնեայ է, եւ նրա աշխատանքը արդիւնաւէտ է միայն համախոհների թիմում»,- պարզաբանած է ան՝ աւելցնելով.- «Դա ո՛չ արհեստավարժութեան, ո՛չ էլ ժողովրդին ծառայելու պատրաստակամութեան հետ կապուած հարց է. հասարակութեանը կարելի է եւ պէտք է պիտանի լինել անկախ դիրքից եւ պաշտօնից: Եւ վստահեցնում եմ բոլորիդ, որ այլ կարգավիճակով եւս շարունակելու եմ իմ այդ ծառայութիւնը»
