10.09c
Երեվան
երկ, հկտ 19
Լիբանանեան «Հըզպալլա» կուսակցութեան ընդհանուր քարտուղար սէյիտ Հասան Նասրալլա խորհուրդ տուած է հրեաներուն հեռանալ Պաղեստինէն: Այս մասին Նասրալլա յայտարարած է, երէկ՝ շիիթներու Աշուրա սգատօնին առթիւ տեղի ունեցած կեդրոնական հաւաքին ընթացքին: Լիբանանցի ղեկավարը նաեւ ըսած է, որ «Պաղեստին գտնուող հրեաները պէտք է ետ դառնան այն երկիրները, ուրկէ եկած են, որպէսզի իրենց անխելք կառավարութեան կողմէ սկսած պատերազմին վառելանիւթ չդառնան»: Ան իր խօսքը հրեաներուն ուղղելով ըսած է.«Սիոնիզմը շահագործեց հրեաներն ու յուդայականութիւնը, որպէսզի Պաղեստինի եւ տարածաշրջանին մէջ կեղեքումի (բռնագրաւման) ծրագիր իրականացնէն, ծառայելով անգլիացիներուն եւ ամերիկեան քաղաքականութեան»:
Ան ընդգծած է, որ «Նաթանիահոյի կառավարութիւնը ձեր ժողովուրդը դէպի կործանում կը տանի: Դուք պիտի վճարէք գինը՝ Նաթանիահոյի անմիտ քաղաքականութեան, որ կը փորձէ տարածաշրջանը նոր պատերազմի մը մէջ ներքաշել»:
Սէյիտ Նասրալլա նշած է նաեւ, որ Նաթանիահուն եւ անոր կառավարութիւնը չեն գիտեր, եթէ պատերազմ սկսին, ինչպիսի աւարտ պիտի ունենայ այդ պատերազմը նշելով, որ «անոր համար մի թողէք, որ ձեր անմիտ կառավարութիւնը ձեզ արկածախնդրութեան տանի»,- եզրակացուցած է շիիթ առաջնորդը:
