5.04c
Երեվան
ուրբ, ապր 17
Ռուսաստանը յոյս ունի, որ Պաքուն եւ Երեւանը պիտի ձգտին հասնիլ յարաբերութիւններու կարգաւորման, այլ ոչ թէ տարաձայնութիւններու ստեղծման: Այս մասին յայտարարած է ՌԴ ԱԳՆ պաշտօնական ներկայացուցիչ Մարիա Զախարովան՝ մեկնաբանելով Պաքուի մէջ այսպէս կոչուած «աւարի այգի» բացումը:
«Ինչ կը վերաբերի այգիին, ապա մենք յոյսով ենք, որ Պաքուն եւ Երեւանը կը ձգտեն հասնիլ յարաբերութիւններու կարգաւորման, այլ ոչ թէ տարաձայնութիւններու ստեղծման…Նման գին վճարուած է…Ահռելի գին, մարդոց կեանքեր…Պէտք է օգտուիլ խաղաղ պահէն, այլ ոչ թէ այս պահն օգտագործել իրավիճակը սրելու համար…Այո, այդ դժուար է՝ յատկապէս զինուած հակամարտութենէն ետք: Շատ դժուար է այն յաղթահարել, նաեւ՝ հոգեպէս: Այս պահուն կը կարեւորենք երկու կողմերու միջեւ վստահութեան ամրապնդումը, դրական տնտեսական օրակարգի ձեւաւորումը, որ ունակ է ապահովելու հեռանկարները Անդրկովկասի կայուն զարգացման համար»,-ըսած է Զախարովան:
Պատասխանելով այն հարցին, որ Պաքուն կը հրաժարի վերադարձնել հայ ռազմագերիները՝ խախտելով 3 նոյեմբեր 2020-ի պայմանաւորուածութիւնը, Զախարովան նշած է, որ Ռուսաստանը աշխոյժ միջնորդական ջանքեր կը գործադրէ՝ Երեւանի եւ Պաքուի միջեւ տարաձայնութիւնները հարթելու համար: Անոր խօսքով՝ Ռուսաստանը կողմ է «բոլորը բոլորի դիմաց» ձեւաչափով խնդիրներու լուծման:
