6.11c
Երեվան
ուրբ, ապր 17
Պէյրութ («Արեւելք»- Լրատուական աղբիւրներ) Լիբանանը կը մտնէ տասնօրեայ հրադադարի համաձայնութեան փուլ մը։ Ներքին եւ շրջանային շրջանակներ ուշադիր կերպով կը հետեւին, թէ որքանով կողմերը պիտի յարգեն այս հրադադարը մինչ հայեացքները կը մնան Լիբանանի հարաւին վրայ, ուր ռազմական գործողութիւններու դադրեցումը պիտի դառնայ համաձայնութեան յաջողութեան առաջին փորձաքարը։
Ամերիկայի Միացեալ Նահանգներու նախագահ Տոնալտ Թրամփ յայտարարեց, թէ «շատ յաջող» զրոյցներ ունեցած է Ժոզէֆ Աունի եւ Բենիամին Նեթանիահուի հետ՝ նշելով, որ կողմերը համաձայնած են սկսիլ տասնօրեայ հրադադար մը։
Թրամփ, գրելով «Truth Social» հարթակին վրայ, շեշտեց, թէ այս քայլը նպատակ ունի հիմք պատրաստելու երկու երկիրներուն միջեւ խաղաղութեան հասնելու համար։ Ան նաեւ յիշեցուց, որ Լիբանանն ու Իսրայէլը երեքշաբթի օրը Ուաշինկթընի մէջ ունեցած են իրենց առաջին հանդիպումը 34 տարուան ընթացքին՝ ներկայութեամբ ԱՄՆ-ի արտաքին գործոց նախարար Մարքօ Ռուպիոյի։
Ան աւելցուց, թէ յանձնարարած է փոխնախագահ Ջէյ Տի Վենսին, արտաքին գործոց նախարարին եւ շտապի միացեալ յանձնաժողովի նախագահ Տան Ռազին Քէյնին՝ գործակցիլ իսրայէլեան եւ լիբանանեան կողմերուն հետ՝ հասնելու մնայուն խաղաղութեան։
Թրամփ ընդգծեց, թէ այս հրադադարը կարեւոր քայլ մըն է Լիբանանի մէջ պատերազմը աւարտելու ուղղութեամբ՝ ակնարկելով նաեւ, որ «պատշաճ ժամանակին» կրնայ այցելել Լիբանան՝ հաստատելու համար դադարը եւ աջակցելու խաղաղեցման գործընթացին։
